२५ करोड मूल्यको सल्लाको आँख्ला भारत निकासी हुन सकेन, १२ टन गोदाममै थन्कियो

उद्योग

गृहपृष्ठ
उद्योग

२५ करोड मूल्यको सल्लाको आँख्ला भारत निकासी हुन सकेन, १२ टन गोदाममै थन्कियो

क्यापिटल नेपाल बुधबार, जेठ १३, २०८३

नेपालगन्ज।सल्लाको आख्ला भारत निकासी नहुँदा जडीबुटी व्यवसायी समस्यामा परेका छन्। आँख्लाको निकासी कर शतप्रतिशत भएकाले २५ करोड बराबरको १२ टन सल्लाको आँख्ला गोदाममा थन्किएको नेपाल जडीबुटी व्यवसायी संघ, नेपालगन्जका अध्यक्ष टंक शर्माले बताए।

‘भन्सार निकासी छुट भए सल्लाको आँख्ला भारत निकासी हुन्छ, व्यवसायीले लगानी गरेर गोदाममा थन्क्याएका छन्’, उनले भने। अध्यक्ष शर्माले सरकारसँग आग्रह गरे पनि यसको समाधान हुन नसकेको बताए।

करिब ३० वर्ष पुरानो सल्लाको रुखबाट त्यस्तो आँख्ला निस्कने गरेको र त्यसलाई भारतमा श्रीखण्ड जस्तै महत्व दिने गरिएको उनको भनाइ छ। सो सल्लाको आँख्ला डोटी, डडेल्धुरा, बैतडीलगायत जिल्लाबाट नेपालगन्ज आउँछ।

यसबाहेक जटामसी, अमला, खिरौला, दालचिनी पनि निकासी हुन सकेको छैन। यी जडीबुटी भारतमा सूचीकृत नभएका कारण निकासी हुन नसकेको उनले बताए। अध्यक्ष शर्माले नेपालमा जडीबुटीबाट प्रशस्त सम्भावना रहे पनि त्यसतर्फ ध्यान र चासो पुग्न नसकेको औँल्याउँदै नेपालको घरघरमा जडीबुटीको उत्पादन भइरहेको उनको भनाइ थियो।–रासस

प्रकाशित मिति: बुधबार, जेठ १३, २०८३ ०६:०६

प्रतिक्रिया दिनुहोस्