बसपार्क हस्तान्तरणमा ढिलाइ

account_box क्यापिटल नेपाल ,
प्रकाशित: २०७६ भदाै २४, मङ्गलबार,१०:३६:AM  
बसपार्क हस्तान्तरणमा ढिलाइ

सुर्खेत । निर्माण सम्पन्न भएको चार महीना बिते पनि सुर्खेत सिटी बसपार्क अझैं सञ्चालनमा आएको छैन ।

निर्माण कम्पनीले नगर विकास कोष र कोषले वीरेन्द्रनगर नगरपालिकालाई हस्तान्तरण गर्नुपर्ने आयोजना प्रक्रियागत ढिलाइका कारण सञ्चालनमा आउन नसकेको हो ।

नगरपालिकाका इञ्जिनीयर विशाल अधिकारीले बसपार्क अब छिट्टै हस्तान्तरण हुने बताए । “हस्तान्तरण प्रक्रिया शुरु भइसकेको छ, सम्भवतः असोजको पहिलो सातासम्म हस्तान्तरण भइसक्छ”, उनले भने, “हस्तान्तरणपछि कसरी सञ्चालन गर्ने भन्ने मोडालिटीका सम्बन्धमा पनि छलफल भइरहेको छ ।”

पटक–पटकको म्याद थपसँगै निर्माण कम्पनी चाङ्मिला/नरसिंहजेभीले चार वर्ष लगाएर अत्याधुनिक संरचनासहितको बसपार्क यही जेठमा सम्पन्न गरेको हो । नगर विकास कोषबाट ऋण सहयोगमा निर्माण सम्पन्न भएको आयोजनालाई वीरेन्द्रनगर नगरपालिकाले नगरको गौरवको आयोजनाका रुपमा लिएको छ ।

सुविधासम्पन्न बसपार्क नहुँदा सुर्खेतबाट सञ्चालित बस, यातायात कर्मचारी तथा यात्रुलगायतले अनावश्यक सास्ती भोग्नुपर्ने बाध्यता थियो । नगर प्रमुख देवकुमार सुवेदीले बसपार्क सञ्चालनमा आएपछि हाल प्रयोगमा आइरहेको बसपार्कलाई मङ्गलगढी पार्कमा विस्तार गर्ने बताए ।

निर्माण कम्पनी चाङ्मिला/नरसिंह जेभी र नगर विकास समितिबीच ०७२ माघमा सम्झौता भएको थियो । पन्ध्र महीनाभित्र सम्पन्न गर्ने सम्झौता भए पनि निर्माण कम्पनीले चार वर्ष लगाएर सिटी बसपार्क पुरा गरेको हो ।

छ करोड ८३ लाख रूपैयाँकाे लागतमा बनेको बसपार्कमा ६४ व्यापारिक सटर, दुई पक्की शौचालय, पर्खाल, गार्ड बस्ने घर, टर्मिनल भवन, टिकट काउन्टर लगायतका संरचना छन् । करीब चार हजार ५०० वर्गमिटर क्षेत्रफल रहेको बसपार्कमा साना–ठूला गरी १२० बस अट्न सक्ने क्षमता रहेको छ । रासस

क्यापिटल नेपाल

थप

expand_more
प्रतिक्रिया दिनुहोस
सम्बन्धित समाचार

क्याटेगोरी पूर्वाधार बाट थप

Top // $this.children('p:not(:first-child)').wrapAll('
');