डिजेल नभएपछि थन्किए विद्युत् प्राधिकरणका उपकरण, अँध्याराेमै बस्न बाध्य छन् जुम्ली

account_box क्यापिटल नेपाल ,
प्रकाशित: २०७६ भदाै २७, शुक्रबार,०८:००:AM  
डिजेल नभएपछि थन्किए विद्युत् प्राधिकरणका उपकरण, अँध्याराेमै बस्न बाध्य छन् जुम्ली

जुम्ला । गत कात्तिकदेखि विद्युत् सङ्कट भएपछि नेपाल विद्युत् प्राधिकरणले उपलब्ध गराएको डिजेल प्लान्ट त्यसै थन्किएको छ । विद्युत् प्राधिकरणले डिजेल प्लान्ट उपकरण मात्र उपलब्ध गराएको र डिजेल उपलब्ध नगराएपछि उपकरण थन्किएको बताइएको छ ।

जुम्लाको विद्युत् सङ्कटका विषयमा संसद्मा ऊर्जामन्त्री वर्षमान पुन र नेपाल विद्युत् प्राधिकरणका कार्यकारी निर्देशक कुलमान घिसिङको आलोचना भएपछि साउन २९ मा डिजेल प्लान्ट जुम्ला पुगेको थियो । जुम्लाका सांसद गजेन्द्रबहादुर महतले प्रतिनिधिसभाको बैठकमा मन्त्री पुन र प्राधिकरणका कार्यकारी निर्देशक घिसिङले बेवास्ता गरेको बताउनुभएको थियो ।

जुम्ला सदरमुकाम खलङ्गा महीनौँदेखि विद्युतविहीन भएको, तर सम्बन्धित व्यक्तिले फोनसमेत नउठाउने गरेको भन्दै सांसद महतले आलोचना गर्नुभएको थियो । सांसद महतले आलोचनापछि प्राधिकरणले जुम्लाका लागि ३०० केभीको डिजेल प्लान्ट पठाएको हो । डिजेल प्लान्टसँग एक जना कर्मचारीको व्यवस्था गरे पनि प्राधिकरणले डिजेल उपलब्ध नगराएकाले उपकरण थन्किएको साना जलविद्युत् उपभोक्ता समितिका अध्यक्ष विष्णुबहादुर बुढ्थापाले बताए ।

“प्राधिकरणले जुम्लाका सांसदको रिस थाम्नका निम्ति मात्रै विद्युत् उकरण दिएको रहेछ”, उनले व्यङ्ग्य गर्दै भने, “प्राधिकरणले उपलब्ध गराएको डिजेल प्लान्ट हरियो घाँस र पानी हाल्दा पनि चलेन । प्रतिघन्टा ५० लिटर डिजेल खर्च हुन्छ । यो खर्च यहाँबाट जुटाउन सकिएन ।” प्राधिकरणले डिजेल उपलब्ध नगराएपछि मेसिन थन्किएको उनकाे भनाइ छ । अहिले सांसद महतले स्थानीय पूर्वाधार कोषबाट २४ लाख ६० हजार रूपैयाँको लगानीमा डिजेल प्लान्ट मेसिन खरीद गरी बिजुली बालिएको अध्यक्ष बुढ्थापाले बताउए ।

ज्याक्सन कम्पनीको दुई सय केभी (१६० किलोवाट) को मेसिनबाट बिजुली बालिएको छ । डिजेलबाट बिजुली बाल्दा बढी खर्च हुने भएकाले एक दिनमा नौ घन्टा मात्र विद्युत् आपूर्ति गर्न सकिएको अध्यक्ष बुढ्थापाले बताए । जुम्ला सदरमुकाम बत्तीविहीन भएपछि सरकारी कामकाजदेखि जनतालाई चाडपर्वको बेला अँध्यारो भएको भन्दै सांसद महतको सांसद विकास कोषबाट ५० लाख रूपैयाँ अल्पकालीन बत्ती बाल्नका लागि विनियोजन गरिएको हो ।

तीन दशकअघि निर्माण भएको साना जलविद्युत् आयोजनामा नयाँ मेसिन जडान गर्न गत कात्तिकदेखि विद्युत् आपूर्ति बन्द गरिएको थियो । तर नयाँ मेसिन जडान गर्ने क्रममा ‘बेरिङ’ भाँचिएपछि विद्युत् आपूर्ति सहज हुन सकेको छैन । मेसिन मर्मतका लागि धनगढी पठाएको मेसिन एक–दुई दिनमा जुम्ला पुग्ने र भदौ मसान्तसम्म पानीबाट बिजुली बाल्ने तयारी भइरहेको अध्यक्ष बुढ्थापाले बताए ।

नयाँ मेसिन जडानका लागि नेपालस्थित भारतीय दूतावासले सहयोग गरेको थियो । भारतीय कम्पनी पासी शुभकामना जेभीलाई जडानको ठेक्का दिइएको थियो । सो कार्यका लागि भारतीय दूतावासले दुई करोड ६३ लाख ७७ हजार रूपैयाँ र उपभोक्ता समितिको ४५ लाख २२ हजार ९०० रूपैयाँ लगानी गरेका छन् । नयाँ मेसिनको बेरिङ भाँचिएपछि डिजेल प्लान्ट जडान गरिएको हो ।

उपभोक्ता समितिले स्थानीय पूर्वाधार कोषको २६ लाख ४० हजार रूपैयाँ खर्च गरेर एक सय ६० किलोवाटको डिजेल प्लान्ट जडान गरिएको हो । मानदत्त रावल/रासस

क्यापिटल नेपाल

थप

expand_more
प्रतिक्रिया दिनुहोस
सम्बन्धित समाचार

क्याटेगोरी मुख्य समाचार बाट थप

Top // $this.children('p:not(:first-child)').wrapAll('
');