दोलखाको जटापोखरीमा केबलकार चलाइने

पर्यटन

गृहपृष्ठ
पर्यटन

दोलखाको जटापोखरीमा केबलकार चलाइने सन् २०२० देखि २०३० सम्म प्रदेश भ्रमण दशक मनाउने प्रदेश सरकारको तयारी

क्यापिटल नेपाल मंगलबार, असार ३, २०७६

काठमाडौं । दोलखाको पर्यटकीय एवम् धार्मिक स्थल जटापोखरीमा केबलकार बन्ने भएको छ । त्यसका लागि प्रदेश ३ ले सुरुमा विस्तृत परियोजना प्रतिवेदन तयार गर्दै छ ।

दोलखा र रामेछापको सिमानामा पर्ने जटापोखरीसम्म केबलकार सञ्चालनका लागि प्रदेशका आर्थिक मामिला तथा योजनामन्त्री कैलाश ढुङ्गेलले प्रदेशसभामा प्रस्तुत गरेको बजेटमा विस्तृत परियोजना प्रतिवेदन तयार गर्न बजेट विनियोजन गरेका हुन् ।

रामेछापको खाँडादेवी गाउँपालिकाको सित्खाबाट खाँडादेवी दोरम्बा सैलुङ र गोकुलगङ्गा गाउँपालिकाको चुचुरेबाट जटापोखरीसम्म केबलकार सञ्चालन गर्ने सरकारको योजना छ । जटापोखरी दोलखाको जिरी नगरपालिका १ श्यामामा छ । यो समुद्री सतहबाट ४ हजार ५ सय मिटर उचाइमा छ ।

यो क्षेत्रको अवलोकन गरी विश्वको सर्वोच्च शिखर सगरमाथाको प्रवेशद्वार नाम्चे निस्कने बाटो पनि भएकाले यसको अझ महत्व छ ।

तामाकोसी नदीको प्रमुख सहायक नदीका रुपमा रहेको खिम्तीखोलाको शिरमा रहेको पाँचपोखरी र जटापोखरी धार्मिक पर्यटनका हिसाबले चर्चित छन् ।

आर्थिक वर्ष २०७६/७७ को बजेटमार्फत सन् २०२० देखि २०३० लाई प्रदेश सरकारले ‘प्रदेश भ्रमण दशक’का रुपमा मनाउने भएको छ । आन्तरिक पर्यटकलाई प्राथमिकतामा राख्दै भ्रमण दशक मनाउन लागिएको हो ।

प्रकाशित मिति: मंगलबार, असार ३, २०७६ १२:५९

प्रतिक्रिया दिनुहोस्