काँकडभिट्टा–इनरुवा रेल आयोजनाः जग्गा अधिग्रहण समस्या समाधानको पहल शुरु

मुख्य समाचार

गृहपृष्ठ
मुख्य समाचार

काँकडभिट्टा–इनरुवा रेल आयोजनाः जग्गा अधिग्रहण समस्या समाधानको पहल शुरु

क्यापिटल नेपाल सोमबार, मंसिर २२, २०७७

काठमाडौं । रेल विभागले पूर्व–पश्चिम विद्युतीय रेलमार्ग निर्माणका क्रममा काँकडभिट्टा इनरुवा खण्डमा रहेका समस्या समाधानको पहल शुरु गरेको छ ।

गत वर्ष विभागले यस खण्डमा जग्गा अधिग्रहण शुरु गरेको थियो । सो क्रममा आएका समस्या स्थानीयस्तरमा नै बुझेर समाधान गर्न खोजिएको विभागका सिनियर डिभिजनल इञ्जिनीयर अमन चित्रकारले बताए ।

उनका अनुसार समस्या बुझ्नका लागि विभागका केही कर्मचारी ती जिल्लाका सम्बन्धित पालिकामा पुगेका छन् । उनले भने, “उनीहरुले सम्बन्धित वडामा नै पुगेर त्यहाँका जनप्रतिनिधिलगायत सम्बन्धित व्यक्तिलाई भेटेर त्यहाँका समस्या पहिचान गरेपछि हामीलाई अघि बढ्न सजिलो हुनेछ ।”

गत वर्ष नै यस खण्डको वातावरणीय प्रभाव मूल्याङ्कन (इआइए) अध्ययन भइसकेको थियो । विभागले झापादेखि मोरङ र सुनसरी खण्डको कूल १०६ किलोमिटर लामो रेलमार्ग निर्माणका लागि जग्गाधनीलाई मुआब्जा वितरण गरी काम शुरु गर्न लागिएको हो ।

यो खण्डमा माटो कटानको काम अवरुद्ध हुँदा अरू खण्डमा भने ट्र्याक बेल्ड निर्माण अघि बढेको विभागले जनाएको छ । बर्दिवास–निजगढ खण्डमा पर्ने रौतहटको सन्तपुर क्षेत्रमा ट्र्याक बेड तथा त्यसमा पर्ने मुख्य र सहायक संरचनाको काम भइरहेको छ । नेपाली लगानी तथा नेपाली निर्माण व्यवसायीले लकडाउनका समयमा समेत काम जारी राखेका छन् ।

यस्तै विजलपुरा खण्डमा पनि निर्माणको काम भइरहेको छ । विभागले स्थानीय प्रशासन र निर्माण व्यवसायीसँग पनि आवश्यक सहजीकरण गरिरहेको छ ।

प्रकाशित मिति: सोमबार, मंसिर २२, २०७७ १७:४४

प्रतिक्रिया दिनुहोस्