सरकारले कोरोना खोप दिने सहमति गरेपछि ट्यांकर चालकद्वारा आन्दोलन फिर्ता

मुख्य समाचार

गृहपृष्ठ
मुख्य समाचार

सरकारले कोरोना खोप दिने सहमति गरेपछि ट्यांकर चालकद्वारा आन्दोलन फिर्ता

क्यापिटल नेपाल मंगलबार, असार १, २०७८

काठमाडौं । सरकारले कोरोनाविरुद्धको खोप दिन सहमत भएपछि इन्धन ढुवानी गर्ने ट्यांकरका चालकहरुले आन्दोलन फिर्ता लिएका हुन् ।नेपाल पेट्रोलियम ट्यांकर चालक संघ र नेपाल आयल निगमबीच भएको वार्तामा ट्यांकर चालकलाई बुधबारदेखि खोप उपलब्ध गराउने सहमति भएको छ ।

‘बुधबारबाट एपीएफ अस्पताल बलम्बुमा खोप लगाउने सहमति भयो र हामीले आन्दोलनका कार्यक्रम फिर्ता लिएका छौं,’ संघका अध्यक्ष ईश्वर लामाले बताए । लामाका अनुसार बागमती प्रादेशिक डिपो कार्यालय थानकोटका ट्यांकर चालक र सहचालकलाई निगमले उपलब्ध गराएको परिचयपत्रको आधारमा खोप लगाउने सहमति भएको छ ।

सहमतिअनुसार थानकोट डिपो र त्यहाँबाट प्रदेशभरि तेल ढुवानी गर्ने ९ सय जना चालक तथा सहचालकले कोरोना खोप पाउनेछन् । यस्तै अमलेखगञ्जका झण्डै १ हजार ४ सय चालक–सहचालकलाई उतै खोप दिने सहमति भएको लामाले बताए ।

कोरोनाविरुद्धको खोप नपाएको भन्दै नेपाल पेट्रोलियम ट्यांकर चालक संघको आह्वानमा बागमती प्रदेशभर आइतबारदेखि पेट्रोलियम पदार्थको ढुवानी अवरुद्ध गरिएको थियो ।

प्रकाशित मिति: मंगलबार, असार १, २०७८ १६:०२

प्रतिक्रिया दिनुहोस्