मोबाइल आयात दोब्बर बढ्यो, नेपालीले ३४ अर्ब १४ करोडको मोबाइल किने

मुख्य समाचार

गृहपृष्ठ
मुख्य समाचार

मोबाइल आयात दोब्बर बढ्यो, नेपालीले ३४ अर्ब १४ करोडको मोबाइल किने

क्यापिटल नेपालआइतबार, असार १३, २०७८

काठमाडौं । कोभिड १९ को महामारीबीच जारी अनलाइन कक्षाहरुले गर्दा मोबाइल आयात बढाएको भन्सार विभागले सार्वजनिक गरेको तथ्यांकले देखाएको छ ।

लकडाउनका कारण सम्पूर्ण शैक्षिक संस्थाहरुले अनलाइन कक्षालाई निरन्तरता दिएपछि नेपालमा स्मार्टफोनको माग बढेको हो । विभागद्वारा सार्वजनिक तथ्यांकमा चालू आर्थिक वर्ष ०७७/०७८ को ११ महिनामा ३४ अर्ब १४ करोड रुपैयाँ बराबरको मोबाइल फोन भारत र चीनलगायत अन्य तेस्रो मुलुकहरुबाट आयात भएको हो । जब की गत आर्थिक वर्ष ०७६/०७७ को सोही अवधिमा नेपालले १५ अर्ब ७४ करोड रुपैयाँको फोन आयात गरेको थियो ।

चालू आर्थिक वर्षको ११ महिनामा विभिन्न कम्पनीहरुले ६५ लाख ६० हजारवटा मोबाइल सेट भित्र्याएका छन भने गत आर्थिक वर्षको सोही अवधिमा ४० लाख ७० हजार मोबाइल सेट भित्रिएको थियो ।

नेपालका लागि एमआई फोनको आधिकारिक वितरक टेलि डाइरेक्टका कार्यकारी अधिकारी सन्जय अग्रवालले नेपालमा शैक्षिक प्रयोजनका लागि स्मार्टफोनको माग व्यापकरुपमा बढेको बताएका छन् ।

कोरोना महामारी तथा प्रसार नियन्त्रणका लागि भारतसँगको खुल्ला सीमामा आवगमन कडाइ गरिदाँ चोरी पैठारीबाट भित्रिने ‘ग्रे फोन’को बजारमा अभाव हुँदा पनि मोबाइल आयात बढेको अग्रवालले बताए ।

अग्रवालका अनुसार गत आर्थिक वर्ष मात्र नेपालले चीनबाट कूल ६० प्रतिशत स्मार्टफोन आयात गरेको थियो । विभागको तथ्यांक अनुसार नेपालले चालू आर्थिक वर्षको ११ महिनामा मात्र चीनबाट २० अर्ब ७६ करोड नेपाली रुपैयाँको स्मार्टफोन आयात गरेको छ जून कूल खर्चको ६१ प्रतिशत हो । सो अवधिमा नेपालले भारतबाट भने ११ अर्ब ८३ करोड नेपाली रुपैयाँको मोबाइल आयात गरेको हो ।

प्रकाशित मिति: आइतबार, असार १३, २०७८ १३:३६

प्रतिक्रिया दिनुहोस्