कोरोना संक्रमितको दर घटेसँगै नर्भिकले मुख्य भवनमा संक्रमितको उपचार नगर्ने

मुख्य समाचार

गृहपृष्ठ
मुख्य समाचार

कोरोना संक्रमितको दर घटेसँगै नर्भिकले मुख्य भवनमा संक्रमितको उपचार नगर्ने

क्यापिटल नेपालमंगलबार, माघ २५, २०७८

काठमाडौं । कोरोना संक्रमितको संख्या र दर घटेसँगै थापाथलीस्थित नर्भिक अस्पतालले आफ्नो मुख्य भवनबाट आगामी फागुन १ गतेदेखि पुनः ननकोभिड उपचार सेवा मात्र प्रवाह गर्ने भएको छ ।

कोभिडको संक्रमण तीव्र भएका बेला नर्भिकले ‘कोभिड क्रिटिकल युनिट’ बाहेक मुख्य भवनमा समेत कोरोना संक्रमितलाई राखी प्रभावकारी उपचार सेवालाई निरन्तरता दिएको थियो । तर, संक्रमण घटेसँगै अस्पतालको मुख्य भवनबाट फागुन १ देखि पूर्ण रुपमा ननकोभिड सेवा मात्र प्रवाह गर्न थालिने अस्पतालका प्रमुख कार्यकारी अधिकृत अजयकुमार मिश्रले जानकारी दिए ।

कोभिड क्रिटिकल युनिट १५ शय्याको छ ।

उनका अनुसार अब नर्भिकले कोभिड संक्रमितहरुको उपचार तथा कोभिडअघि वा पछिको परामर्श सेवा अस्पतालको पार्किङनजिकै अलग्गै निर्माण गरिएको कोभिड क्रिटिकल युनिटबाट मात्रै प्रवाह गर्नेछ ।

नर्भिकले केही समयअघिदेखि नेपालका निजी अस्पतालमै पहिलोपटक ‘कोभिड ओपिडी सेवा’ को समेत सुरुवात गरेको थियो । सो सेवासमेत कोभिड क्रिटिकल केयरबाटै प्रवाह हुँदै आएको छ । साथै सो सेवालाई अझ प्रभावकारी बनाइएको र निरन्तर रहनेसमेत मिश्रले जानकारी दिए ।

उनका अनुसार नर्भिकको मुख्य भवनमा अब सामान्य अवस्थाको झैं उपचार सेवा प्रवाह हुनेछ । सर्वसाधारणले ढुक्क भएर पहिलेझैं विश्वस्तरीय स्वास्थ्य सेवा लिन सक्ने उनको भनाइ छ ।

प्रकाशित मिति: मंगलबार, माघ २५, २०७८ १२:३७

प्रतिक्रिया दिनुहोस्