६ महिनामा सरकारकाे बजेट खर्च ३२ प्रतिशतमात्र

मुख्य समाचार

गृहपृष्ठ
मुख्य समाचार

६ महिनामा सरकारकाे बजेट खर्च ३२ प्रतिशतमात्र

क्यापिटल नेपालसोमबार, माघ २, २०७९

काठमाडाैं । चालू आर्थिक वर्ष २०७९/८० को अर्धवार्षिक समीक्षा अवधिमा सरकारको बजेट खर्च ३२ दशमलव १३ प्रतिशत बराबर देखिएको छ ।

महालेखा नियन्त्रक कार्यालयको तथ्यांकअनुसार पुस मसान्तसम्ममा सरकारले ५ खर्ब ७६ अर्ब ३४ करोड ७६ रूपैयाँ बराबर खर्च गरेको छ । चालू आर्थिक वर्षका लागि सरकारले कुल १७ खर्ब ९३ अर्ब ८३ करोड ७३ लाख रूपैयाँ बराबर विनियोजन गरेको थियो ।

बजेटको अर्धवार्षिक समीक्षा अवधिमा १४ प्रतिशत बराबर मात्रै पुँजीगत खर्च भएको छ । चालू आवका लागि सरकारले पुँजीगत शीर्षकमा ३ खर्ब ८० अर्ब ३८ करोड ४५ लाख रूपैयाँ बराबर बजेट छुट्याएको थियो । पुस मसान्तसम्ममा पुँजीगत खर्च ५३ अर्ब ४५ करोड ५२ लाख रूपैयाँ बराबर खर्च भएको हो ।

चालू शीर्षकमा ११ खर्ब ८३ अर्ब २३ करोड ५१ रूपैयाँ बराबर विनियोजन भएकामा ३८ दशमलव ४६ प्रतिशत अर्थात् ४ खर्ब ५५ अर्ब १२ करोड ७० लाख रूपैयाँ खर्च भएको पनि महालेखा नियन्त्रण कार्यालयले जनाएको छ ।

त्यस्तै वित्तीय व्यवस्थापनतर्फ २ खर्ब ३० अर्ब २१ करोड ७७ लाख रूपैयाँ बराबर विनियोजन भएकामा २९ दशमलव ४४ प्रतिशत अर्थात् ६७ अर्ब ७६ करोड ५४ बराबर खर्च भएको छ ।

यही अवधिमा सरकारको राजस्व संकलन वार्षिक लक्ष्यको ३३ दशमलव ९३ प्रतिशत बराबर देखिएको छ । चालू आर्थिक वर्षका लागि सरकारले १४ खर्ब ३ अर्ब १४ करोड ७० लाख रूपैयाँ बराबर राजस्व उठाउने लक्ष्य राखेको छ । तर, ६ महिना अवधिमा वार्षिक लक्ष्यको ३३ दशमलव ९३ प्रतिशत अर्थात् ४ खर्ब ९४ अर्ब ८४ करोड ५८ लाख बराबर खर्च भएको छ । जसमध्ये कर राजस्वतर्फ ४ खर्ब ५ अर्ब २६ करोड ९३ लाख र गैरकर राजस्वतर्फ रु ५३ अर्ब ७१ करोड ७५ लाख बराबर संकलन भएको छ ।

चालू आर्थिक वर्षका लागि सरकारले ५५ अर्ब ४५ करोड ८३ लाख रूपैयाँबराबर वैदेशिक अनुदान लिने लक्ष्य राखेको थियो । हालसम्म वार्षिक लक्ष्यको आठ दशमलव ६६ प्रतिशत अर्थात् ४ अर्ब ८० करोड २० लाख रूपैयाँ बराबर वैदेशिक अनुदान सरकारले लिएको छ ।

प्रकाशित मिति: सोमबार, माघ २, २०७९ ११:२६

प्रतिक्रिया दिनुहोस्