भारतद्वारा नेपाललाई दिने नियमित बजेट घटाएर ८ अर्ब ८० करोडमा सीमित

मुख्य समाचार

गृहपृष्ठ
मुख्य समाचार

भारतद्वारा नेपाललाई दिने नियमित बजेट घटाएर ८ अर्ब ८० करोडमा सीमित

क्यापिटल नेपालबुधबार, माघ १८, २०७९

काठमाडौं। भारतले प्रत्येक आर्थिक वर्षकाे बजेटमा नेपालका लागि विनियाेजन गर्दै आएकाे नियमित सहयाेग यसपालि कटाैती गरेकाे छ। भारतीय वित्तमन्त्री निर्मला सीतारमणले बुधबार संसदमा आर्थिक वर्ष सन् २०२३/२४ काे बजेट प्रस्तुत गर्दै नेपाललाई ५ अर्ब ५० करोड भारु (८ अर्ब ८० करोड रुपैयाँ) विनियाेजन गरिएकाे बताइन्।

भारतले गत वर्ष नेपाललाई ७ अर्ब ५० करोड भारु (१२ अर्ब रुपैयाँ) सहयोग गर्ने घोषणा गरेको थियो। तर, बजेटमा घोषणा भएअनुसार सहयोग नभएको देखिएको छ।

गत वर्ष ४ अर्ब २५ करोड भारु (६ अर्ब ८० करोड रुपैयाँ) मात्र नेपाललाई सहयोग गरिएको भारतीय बजेटमा उल्लेख छ। भारतले दक्षिण एसियामा नेपालसहित भुटान, बंगलादेश, श्रीलंका, अफगानिस्तान र माल्दिभ्सका लागि नियमित बजेट विनियाेजन गर्दै आएकाे छ।

भारतले दक्षिण-पूर्वी एसिया र अफ्रिकी देशहरूलाई पनि सहयोग गर्ने गर्छ। उसले आगामी वर्ष भुटानलाई सहयोग दिन २४ अर्ब भारु विनियाेजन गरेकाे छ। भारतले छिमेकी तथा मित्रदेशका लागि ५४ अर्ब भारु सहयोग गर्ने घोषणा यसपालिकाे नयाँ बजेटमार्फत गरेको छ।

भारतले विगतदेखि नै सबैभन्दा बढी सहयोग भुटानलाई गर्ने गरेको छ। नेपाललाई यसरी दिने भनिएको सहयोग भने बजेटरी माध्यमबाट आउने गर्दैन।

प्रकाशित मिति: बुधबार, माघ १८, २०७९ १४:४९

प्रतिक्रिया दिनुहोस्