सूचना प्रविधि क्षेत्र राष्ट्रिय प्राथमिकतामा छ : मन्त्री शर्मा

प्रविधि

गृहपृष्ठ
प्रविधि

सूचना प्रविधि क्षेत्र राष्ट्रिय प्राथमिकतामा छ : मन्त्री शर्मा

क्यापिटल नेपाल सोमबार, साउन १५, २०८०

काठमाडौं। सञ्चार तथा सूचना प्रविधि मन्त्री रेखा शर्माले सरकारले सूचना प्रविधि क्षेत्रलाई राष्ट्रिय प्राथमिकतामा राखेको बताएकी छिन्।

सरकारका प्रवक्तासमेत रहेकी मन्त्री शर्माले सोमबार काठमाडौंमा आयोजित कार्यक्रममा यस्तो बताएकी हुन्। ‘एक समय सूचना प्रविधि क्षेत्रलाई मनोरञ्जनका साधनको रूपमामात्र व्याख्या गरिन्थ्यो। तर, अहिले त्यो अवस्था परिवर्तन भएको छ,’ मन्त्री शर्माले भनिन्, ‘सूचना प्रविधिको महत्त्व बुझेर हाल सरकारले यसलाई राष्ट्रिय प्राथमिकतामा राखेको छ।’

उनले उद्यमशीलता, नवप्रर्तन र आविष्कारलाई अघि बढाउन सरकारले काम गरिरहेको पनि बताइन्। ‘सूचना प्रविधिको विकास गर्दै डिजिटल अर्थतन्त्र प्रवर्द्धनको बाटोमा सरकार अघि बढिरहेको छ,’ शर्माले भनिन्, ‘यसैका लागि सरकारले हाल यो क्षेत्रको वैदेशिक लगानीको सिमा पनि हटाएको छ।’ उनले यही क्षेत्र विकासका लागि पुँजिगत बजेटको एक प्रतिशत बजेट छुट्याइएको बताइन्।

सूचना प्रविधि क्षेत्रमा काम गर्न सकेमा र अगाडि बढ्न सकेमा यसबाट मुलुकले आर्थिक समृद्धि हासिल गर्न सक्ने उनको भनाइ छ। यस क्षेत्र विकासका लागि सबै क्षेत्र र निकायको सहकार्य आवश्यक भएको उनको भनाइ छ।

प्रकाशित मिति: सोमबार, साउन १५, २०८० १२:०४

प्रतिक्रिया दिनुहोस्