पर्यटन

पोखरामा निर्माणाधीन ‘अनामिका रिट्रिट रिसोर्ट’ बिक्रीमा

काठमाडौं। आर्थिक मन्दीका कारण पोखरा पामेमा निर्माणाधीन रिसोर्ट ‘अनामिका रिट्रिट’ बिक्रीमा राखिएको छ। अनामिका रिट्रिट सञ्चालक रमेश थापाले जारी आर्थिक मन्दी लम्बिँदै गएको र बैंक ब्याजदर बढ्दै जाने स्थिति देखिएकाले निर्माणाधीन अवस्थामै रिसोर्टको जग्गा बिक्रीमा राखिएको जानकारी दिए।

रिसोर्ट निर्माण गर्न आवश्यक नक्सासहित डिजाइन पास गराएर तयारी अवस्थामा रहेका बेला बैंक ब्याज अत्यधिक बढेको र तत्कालै समस्या समाधान हुने स्थिति नदेखिएपछि निर्माणाधीन अवस्थामै बिक्री गर्न लागेको उनले बताए।

धेरैको चासो रहेको पोखरा अन्तर्राष्ट्रिय विमानस्थलबाट अन्तर्राष्ट्रिय उडान पनि हुन नसकेको र अपेक्षाअनुसार पर्यटक पनि नआइरहेका बेला रिसोर्टमा लगानी गर्न उपयुक्त नदेखिएको उनको भनाइ छ।

अहिले उनले रिसोर्ट निर्माण गर्न लागिएको ६ रोपनी १० आना २ पैसा २ दाम जग्गाको मूल्य ६ करोड रुपैयाँ निर्धारण गरी बिक्रीमा राखेका छन्।

लामो समयदेखि पोखरामा शिक्षा र पर्यटन क्षेत्रमा लगानी गर्दै आएका थापाले २०७८ सालदेखि नै पामेमा रिसोर्ट सञ्चालन गर्ने तयारी थालेका थिए। तर, बैंकले लगानी गर्न नमानेको र लगानी गरिहाले पनि ब्याजदर उच्च भएपछि तत्काल पछि हटेको उनले बताए।

याे पनि पढ्नुहाेस्

लेकसाइडमा थपिँदै नयाँ रिसोर्ट ‘अनामिका रिट्रिट’, २२ करोड लगानी

त्यो बेला उनले २२ करोड रुपैयाँ लगानीमा दुई वर्षभित्र सञ्चालनमा ल्याउने गरी काम सुरु गर्ने बताएका थिए। ५६ कोठा रहने रिसोर्टमा स्विमिङ पुल र हेल्थ क्लब पनि बनाउने बताएका थिए।

प्रकाशित मिति: बुधबार, भदौ २०, २०८० १४:१३

प्रतिक्रिया दिनुहोस्