उद्योग

उद्योगमा बिजुली बन्द नगर्न प्रधानमन्त्री दाहालको कुलमानलाई निर्देशन

क्यापिटल नेपाल सोमबार, भदौ २५, २०८०

काठमाडौं। प्रधानमन्त्री पुष्पकमल दाहालले ट्रंकलाइन महसुल छुट र मिनाहाको विषय नटुंगिएसम्म उद्योगहरूको विद्युत आपूर्ति बन्द नगर्न नेपाल विद्युत प्राधिकरणलाई निर्देशन दिएका छन्।

नेपाल उद्योग वाणिज्य महासंघका अध्यक्ष चन्द्रप्रसाद ढकालको नेतृत्वमा महासंघ पदाधिकारीसहित प्रधानमन्त्री निवास बालुवाटार पुगेको प्रतिनिधिमण्डलसँगको भेटपछि प्रधानमन्त्री दाहालले नेपाल विद्युत प्राधिकरणका कार्यकारी निर्देशक कुलमान घिसिङलाई टेलिफोन सम्पर्क गरी उक्त निर्देशन दिएका हुन्।

उनले यससम्बन्धी विषयमा महासंघ र प्राधिकरणलाई सँगै राखेर ट्रंकलाइन विद्युत आपुर्ति विषय छिटै टुंगाेमा पुर्‍याउने कुरामा आफूले पहल गर्ने बताए।

केही दिन अघिमात्र विद्युत प्राधिकरणले उद्योगलाई ट्रंङ्कलाइनको बक्यौता महसुल चुक्ता गर्न सूचना जारी गरेको थियो। उक्त सूचनामा बक्यौता महसुल चुक्ता नगर्ने उद्योगको विद्युत आपूर्ति बन्द गर्ने जनाएको थियो।

याे पनि पढ्नुहाेस्

उद्योगीमाथि अन्याय हुन नदिने प्रधानमन्त्री दाहालको प्रतिबद्धता

महासंघले अहिलेको आर्थिक संकटको समयमा उद्योग व्यवसायी पूर्णक्षमतामा सञ्चालन हुन नसकेको हुँदा ट्रंकलाइन प्रयोग नभएको र सरकारले संकटमा रहेका उद्योग व्यवसायलाई जोगाउन छुट तथा मिनाहाको व्यवस्था गर्नुपर्ने माग राखेको छ।

कोभिड महामारीपछि नेपालको उद्योग व्यवसाय निरन्तर संकटमा रहेको र यस अवस्थामा उद्योग व्यवसायको विद्युत काट्दा व्यवसायी थप हतोत्साही हुने महासंघको धारणा छ।

भदौ १७ गते प्राधिकरणले डेडिकेटेड र ट्रंक लाइनबाट लिएको बिजुली महसुल भुक्तानी नगरे उद्योगलाई बिजुली बन्द गर्ने चेतावनीसहित सूचना प्रकाशित गरेको थियो।

प्राधिकरणका अनुसार झन्डै पाँच दर्जन उद्योगबाट १५ अर्ब रुपैयाँ असुली गर्न बाँकी रहेको छ। यो ब्याज बाहेकको रकम हो।