बराहपोखरीबाट पौने २ करोडको खसी बिक्री

कृषि

गृहपृष्ठ
कृषि

बराहपोखरीबाट पौने २ करोडको खसी बिक्री

क्यापिटल नेपालशनिबार, कात्तिक ४, २०८०

खोटाङ। दसैंतिहारका अवसरमा खोटाङ बराहपोखरी गाउँपालिकाबाट १ करोड ७५ लाख रूपैयाँ बढीको खसी काठमाडौं निर्यात भएको छ।

खसीबाख्रापालनका लागि उपयुक्त भूगोल मानिने बराहपोखरीबाट ठेकेदारको पाँच समूहले ८ सय ७५ खसी काठमाडौं पुर्याएका छन्।

एउटा खसीको सरदर मूल्य २० हजार मान्दा १ करोड ७५ लाखभन्दा बढी रकम पालिका भित्रिएको बराहपोखरी गाउँपालिकाका पशुसेवा शाखा प्रमुख आशिष बञ्जराले जानकारी दिए। खसी खरिदका लागि ठेकेदारको समूह गाउँपालिकाका ६ वटै वडाका किसानको घर–घर पुगेका थिए।

दसैंतिहारका अवसरमा घरैमा खसी बिक्री हुँदा कतिपय एकैघरका किसानले ५–६ लाखसम्म हात पारेका छन्। कतिपय किसानले एउटै खसी ८० किलाे तौलसम्मका बिक्री गरेका छन्।

किसानबाट खरिद गरिएका खसी ठेकेदारले धाप्लाङघाटस्थित सुनकोसी पार गराएपछि आठवटा ट्रक र दुईवटा बोलेरोमा हालेर अन्यत्र लगेका थिए। उनीहरूले खसीलाई धाप्लाङघाटसम्म हिँडाएर पुर्याएका थिए।

कतिपय खसी कात्तिक १ गते बिहान र कतिपय कात्तिक २ गते बिहान काठमाडौँ पुर्याएको पशु सेवा शाखा प्रमुख बञ्जराले जानकारी दिए। कतिपय किसानले आफैं उदयपुर गाईघाट लगेर खसी बिक्री गरिरहेका छन्।

१० स्थानीय तह रहेको जिल्लाबाट यस वर्ष दसैंतिहारका अवसरमा करोडौं मूल्यबराबरका खसी बिक्री भएको बाख्रापालन व्यवसायी संघ खोटाङले जनाएको छ।

दुई नगरपालिका र आठ गाउँपालिका रहेको जिल्लामा पछिल्लो समय व्यावसायिकरूपमा बाख्रापालन गर्ने किसान संख्या बढ्दै गएको छ।

प्रकाशित मिति: शनिबार, कात्तिक ४, २०८० १४:३१

प्रतिक्रिया दिनुहोस्