माछापालनमा १ करोड लगानी, मासिक डेढ लाख आम्दानी

कृषि

गृहपृष्ठ
कृषि

माछापालनमा १ करोड लगानी, मासिक डेढ लाख आम्दानी

क्यापिटल नेपालसोमबार, फागुन १४, २०८०

सल्लेरी। अवसरको खोजी गर्दै विदेशी भूमिमा पाइला टेक्नेहरुको संख्या दिनानुदिन बढ्दो छ। हरेक दिन एक हजार पाँच सयभन्दा बढी युवाजनशक्ति हातमा पासपोर्ट बोकेर विदेशी मुलुकमा पाइला टेक्छन्। यही लहरोमा कुनै समय सोलुखुम्बु रोक्दिङका भलाकाजी राजभण्डारी पनि मिसिए र अवसर खोज्दै विदेश पुगे। २०६७ मा रोजगारीका लाग मलेसिया पुगेका उनले त्यहाँ करिब ३ वर्ष पसिना बगाए। उनलाई लाग्यो, त्यहाँ बगाउने पसिना गाउँमै बगाउन सक्ने हो भने धेरै काम गर्न सकिन्छ। यही सोचले स्वदेश फर्केका उनी यतिबेला गाउँमै माछापालनमा रमाएका छन्।

'जागिरको खोजीमा म विदेश जाँदिन। एकपटक अञ्जानमा विदेश गइयो। विदेश के रहेछ र त्यहाँको दुःख के हो भन्ने बुझ्नै मौका पनि मिल्यो,' उनले भने। उनले माछापालनबाट मासिक सबै खर्च कटाएर १ लाख ५० हजार रुपैयाँ बचत भइरहेको बताए। 'दैनिक औसतमा १५ हजारको कारोबार हुन्छ।

त्यसबाट ५ हजार रुपैयाँ जति बचत हुन्छ,' उनले भने। सोलुदुधकुण्ड नगरपालिका-४ रोक्दिङमा करिब ४ रोपनी क्षेत्रफलमा निर्माण गरिएको पोखरीमा ‘ट्राउट’ माछापालन गर्दै आएका उनीसँग अहिले ४० हजारभन्दा बढी माछाका भुराहरू छन्। उनले माछापालनका लागि १० वटा पोखरी निर्माण गरेका छन्। 'विदेशबाट फर्किपछि अन्य काम गरिरहेको थिए। कमाइ पनि ठिकै थियो। कोरोना महामारीका कारण बन्दाबन्दी लागू भएपछि भने आम्दानी ठप्प भयो,' उनले भने।

सबै काम ठप्प भएपछि माछापालनको योजना बनाएको उनले सुनाए। सुरुमा माछापालनको योजना सुनाउँदा धेरैले हुँदैन भन्ने गरे पनि अहिले माछापालनबाट आम्दानी हुन थालेपछि भने प्रसंशा गर्ने गरेको उनको भनाइ छ। उनले अहिले दैनिक १८ घण्टासम्म समय माछापालनमा दिने गरेका छन्। २०७७ सालबाट सुरु गरेको माछापालनमा हालसम्म १ करोड रुपैयाँ लगानी भइसकेको छ। रासस

प्रकाशित मिति: सोमबार, फागुन १४, २०८० १२:३३

प्रतिक्रिया दिनुहोस्