प्रभु बैंकका डेपुटी सिइओ न्यौपाने पक्राउ, सेञ्चुरीमा ऋण हिनामिनाको आरोप

समाज

गृहपृष्ठ
समाज

प्रभु बैंकका डेपुटी सिइओ न्यौपाने पक्राउ, सेञ्चुरीमा ऋण हिनामिनाको आरोप

क्यापिटल नेपाल मंगलबार, फागुन १५, २०८०

काठमाडौं। नेपाल प्रहरीको केन्द्रीय अनुसन्धान ब्युरो (सिआइबी) ले प्रभु बैंकका नायब प्रमुख कार्यकारी अधिकृत मनोज न्यौपानेलाई पक्राउ गरेृको छ।

तत्कालीन सेञ्चुरी बैंकमा रहँदा ऋण प्रवाहमा अनियमितता भेटिएपछि उनलाई सिआइबीले पक्राउ गरेको हो।

उनी प्रभुमा सेञ्चुरी गाभिनुअघि सेञ्चुरीमा सिइओ थिए। सिआइबीका अनुसार न्यौपानेसहित चार जना प्रभुको केन्द्रीय कार्यालय बबरमहलबाट र पाँच जना कमलादी कार्यालयबाट पक्राउ परेका हुन्।

यसअघि नेपाल राष्ट्र बैंकले सेञ्चुरीमा भएका कर्जा दुरुपयोगसम्बन्धी फाइल अध्ययन गर्न सिआइबीलाई अनुरोध गरेको थियो। सिआइबीको प्रारम्भिक अध्ययनमा न्यौपानेसहितका कर्मचारी दोषी देखिएपछि पक्राउ गरिएको हो।

पक्राउ पर्नेमा सेञ्चुरीकै पूर्वसीईओ तुल्सीराम गौतमसमेत रहेका छन्। गौतमले सेञ्चुरी छाडेलगत्तै लामो समय कामु भएर सेञ्चुरी चलाएका न्यौपाने त्यसपछि सिइओ नियुक्त भएका थिए। बैंकले समस्याग्रस्त देउराली सहकारीसँग मिलेर ऋण प्रवाह गरेको आरोप गौतम र न्यौपानेमाथि लगाइएको छ।

सेञ्चुरीको कर्जा हिनामिना सम्बन्धमा थप अनुसन्धान गरिने सिआइबीले जनाएको छ। सेञ्चुरीको कर्जा बिग्रिएपछि प्रभुको निस्क्रिय कर्जा अनुपात (एनपिएल) ह्वात्तै बढेको छ।

त्यही कारण ६ महिनाभित्र हुनुपर्ने बैंकको साधारणसभासमेत हुन सकेको छैन। अहिले प्रभुको कर्जा फाइललाई सिआइबी र राष्ट्र बैंकले सूक्ष्म अध्ययन गरिरहेका छन्।

प्रकाशित मिति: मंगलबार, फागुन १५, २०८० ११:३२

प्रतिक्रिया दिनुहोस्