करिब १० करोड लागतको पुल अलपत्र

पूर्वाधार

गृहपृष्ठ
पूर्वाधार

करिब १० करोड लागतको पुल अलपत्र

क्यापिटल नेपालबुधबार, फागुन ३०, २०८०

नवलपरासी। पश्चिम नवलपरासीको बर्दघाट नगरपालिका–५ र १६ जोड्ने खजुरा खोलामाथि निर्माणाधीन पुलको काम बन्द भएको छ। करिब १० करोड रुपैयाँ लागतमा निर्माणाधीन उक्त पुलको भुक्तानी लामो समयसम्म नपाएको भन्दै ठेकेदार कम्पनीले काम ठप्प बनाएपछि निर्माणको काम अलपत्र भएको हो। निर्माण व्यवसायीले अहिलेसम्म काम गरेबापत पाउनुपर्ने १ करोड १० लाख रुपैयाँमध्ये हालसम्म १६ लाख रुपैयाँ मात्र भुक्तानी दिएको बर्दघाट नगरपालिकाले बताएको छ।

पाउनुपर्ने बाँकी रकम नपाएको भन्दै निर्माण व्यवसायीले काम ठप्प पारेका नगरप्रमुख शम्भुलाल श्रेष्ठले बताए। 'रकम भुक्तानीका लागि केही महिनाअघि अर्थ मन्त्रालयमा सिफारिस गरेर पठाएका थियौँ,' उनले भने, 'अहिलेसम्म रकम नआएपछि व्यवसायीले काम रोकेको छ।'

वर्षायाममा खोला तर्न कठिन हुँदा बर्दघाटसँगै छिमेकी पालिका सुस्ता र प्रतापपुरका स्थानीय लामो दूरी भएर आवतजावत गर्नुपर्ने बाध्यतालाई हटाउन खोलामा पुल निर्माण थालिएको थियो। सम्झौतापछिको लामो समयसम्म निर्माण कम्पनीले काम बन्द गरेपछि नगरपालिकाको अनुरोधमा जिल्ला प्रशासनले प्रहरीमार्फत निर्माण व्यवसायीलाई सम्पर्कमा ल्याएर काम सुरु गराएको थियो। विसं २०७७ मा श्रीमती सञ्जीवनी निर्माण सेवाले रू नौ करोड ७७ लाखमा पुल निर्माणको ठेक्का लिएको हो। रासस

प्रकाशित मिति: बुधबार, फागुन ३०, २०८० १४:४६

प्रतिक्रिया दिनुहोस्