आगामी बजेटको प्राथमिकतामा जलविद्युत, आइटी र कृषि उद्योग : अर्थमन्त्री पुन

अर्थतन्त्र

गृहपृष्ठ
अर्थतन्त्र

आगामी बजेटको प्राथमिकतामा जलविद्युत, आइटी र कृषि उद्योग : अर्थमन्त्री पुन

क्यापिटल नेपाल बिहीबार, चैत ८, २०८०

काठमाडौं। अर्थमन्त्री वर्षमान पुनले आगामी आर्थिक वर्ष २०८१/८२ को बजेटमा जलविद्युत, आइटी क्षेत्र र कृषि उद्योगलाई प्राथमिकता दिइने बताएका छन्। बिहीबार प्रतिनिधिसभाको अर्थ समितिमा भएको आर्थिक वर्ष २०८१/८२ का लागि विनियोजन विधेयकको प्राथमिकता र सिद्धान्तका विषयमा भएको छलफलमा उनले बजेटको प्राथमिकता बताएका हुन्। `कृषि क्षेत्रलाई आधुनिकीकरण गर्दै उद्योगसँग जोड्न आवश्यक छ। परम्परागत कृषिको अवस्थालाई चिरेर उद्योगमा जोडी अर्थतन्त्र सबल बनाउने पाटोमा जाने विषय हाम्रो प्राथमिकतामा छन्,' उनले भने, 'साथै पर्यटन क्षेत्रलाई पनि प्राथमिकतामा राखिएको छ।' अर्थमन्त्री पुनले यसअघिको सरकारले भारतमा १० हजार मेगावाट विद्युत् निर्यात गर्ने विषयमा सम्झौता गरी बजार सुनिश्चित गरेकाले त्यसलाई प्राथमिकतामा राखिएको बताए। 'अबको छोटो समयमा धेरै व्यापार गर्न सकिने क्षेत्र जलविद्युत हो,' उनले भने।

गत वर्ष ७६ अर्बको आइटी सफ्टवेयर निर्यात भएको अध्ययनले देखाएको जिकिर गर्दै उनले अर्थतन्त्र सबल बनाउने र निर्यात बढाउने महत्त्वपूर्ण क्षेत्र आइटी नै हुनसक्ने बताए। 'त्यसैले आइटीको विकास र विस्तारका सन्दर्भमा आगामी बजेटले जोड दिनेछ,' उनले भने। अर्थमन्त्री पुनले बजेट प्रभावकारी बनाउन यस वर्ष तीन महिना अगाडि नै विनियोजन विधेयकमाथी छलफल थालिएको बताए। 'विगतमा एकदमै अन्तिम अवस्थामा नीति तथा कार्यक्रम ल्याउने र छलफल गर्ने ठाउँ नहुने अवस्थाको पनि हामीले अन्त्य गरेका छौं,' पुनले भने, 'कर्मकाण्डको रुपमा मात्र गरिँदै आएको छलफललाई अब हामीले नयाँ ढंगले सम्बोधन गर्ने प्रयत्न गरेका छौं।'

प्रकाशित मिति: बिहीबार, चैत ८, २०८० १२:३१