अर्थतन्त्र

आर्थिक वृद्धिदर ४ प्रतिशतले बढ्ने सरकारी अनुमान

क्यापिटल नेपालमंगलबार, चैत २०, २०८०

काठमाडौं। चालू आर्थिक वर्ष २०८०/८१ को दोस्रो त्रैमास (साउन–पुस)सम्म ४ प्रतिशतले आर्थिक वृद्धि भएको प्रारम्भिक अनुमान गरिएको छ। २०७९/८० को दोस्रो त्रैमासको तुलनामा यस वर्ष आर्थिक वृद्धिदर ४ प्रतिशतले बढ्ने अनुमान सरकारी निकाय राष्ट्रिय तथ्यांक कार्यालयले सार्वजनिक गरेको विवरणले देखाएको हो।

मंगलबार प्रकाशित विवरणअनुसार कार्यालयले यस त्रैमासमा अर्थतन्त्र वृद्धि हुनुमा धान, मकै, गहुँ, र अन्य कृषि उत्पादनमा भएको वृद्धि तथा पर्यटक आगमनमा भएको बढोत्तरीलाई मुख्य कारण मानेको छ। होटल क्षेत्रको कुल मूल्य अभिवृद्धिले समग्र अर्थतन्त्रमा योगदान गरेको कार्यालयको तथ्यांकमा उल्लेख छ।

२०८०/८१ को पहिलो त्रैमासको तुलनामा अर्थतन्त्र ०.७ प्रतिशतले वृद्धि भएको छ। व्यापार र उद्योगबाहेक अन्य क्षेत्रमा समेत सकारात्मक वृद्धि भएको देखिएको छ। क्षेत्रगत तुलना गरिहेर्दा सबैभन्दा धेरै वृद्धि आवास तथा खानेकुरा सेवासँग सम्बन्धित क्रियाकलापको २९.३ प्रतिशतले वृद्धि भएको छ। यातायात तथा भण्डारण क्षेत्रमा १४.३ प्रतिशत वृद्धि देखिएको छ।

निर्माण क्षेत्रमा २.२ प्रतिशतको संकुचन आएको छ। वित्तीय तथा बिमा क्षेत्रको वृद्धिदर ९.१ प्रतिशत, कृषि, वन तथा मत्स्य क्षेत्रको वृद्धिदर ३ प्रतिशत र थोक तथा खुद्रा व्यापार ०.५ प्रतिशत मात्र बढेको तथ्यांकमा उल्लेख छ।

सरकारले बजेटमा यस वर्ष ६ प्रतिशत हाराहारी आर्थिक वृद्धि हुने अनुमान गरेको थियो। कार्यालयको तथ्यांकले लक्ष्य भेट्याउन मुस्किल देखिएको छ। विश्व बैंकले मंगलबार नै यस वर्ष नेपालको ३.३ प्रतिशत आर्थिक वृद्धिदर हुने प्रक्षेपण सार्वजनिक गरेको छ।