प्रतिनिधिसभा बैठक बस्दै, प्रधानमन्त्रीले नीति तथा कार्यक्रममाथिको जवाफ दिने कार्यसूची

अर्थतन्त्र

गृहपृष्ठ
अर्थतन्त्र

प्रतिनिधिसभा बैठक बस्दै, प्रधानमन्त्रीले नीति तथा कार्यक्रममाथिको जवाफ दिने कार्यसूची

क्यापिटल नेपालशुक्रबार, जेठ ११, २०८१

काठमाडौं । आगामी आर्थिक वर्ष २०८१/०८२ को नीति तथा कार्यक्रममाथि संसदमा आजदेखि छलफल सुरु हुने कार्यसूची संघीय संसद सचिवालयले प्रकाशित गरेको छ। प्रतिपक्षी नेपाली कांग्रेसले सहकारी प्रकरणमा संसदीय छानविन समिति गठनको माग गर्दै संसद अवरुद्ध गरिरहेका बेला आज प्रधानमन्त्री पुष्पकमल दाहालले आगामी आर्थिक वर्षको नीति तथा कार्यक्रममाथि सांसदले उठाएका प्रश्नको जवाफ दिने कार्यक्रम छ।

प्रधानमन्त्रीले राष्ट्रपति रामचन्द्र पौडेलले जेठ १ मा संघीय संसदनको दुवै सदनको संयुक्त बैठकमा गरेको सम्बोधनमा आर्थिक वर्ष २०८१/०८२ को नेपाल सरकारको वार्षिक नीति तथा कार्यक्रममाथिको छलफल प्रारम्भ गरियोस् भनी प्रस्ताव प्रस्तुत गर्नेछन्। त्यसलगत्तै प्रधानमन्त्रीले बैठकमा नीति तथा कार्यक्रममाथि छलफलका क्रममा उठेका प्रश्नको जवाफ दिनेछन्।

गत शुक्रबार प्रमुख प्रतिपक्षी कांग्रेससहितका विपक्षी दलहरूको वेल घेराउ र नाराबाजीबीच पनि प्रधानमन्त्रीले सदनमा नीति तथा कार्यक्रम प्रस्तुत गरेका थिए।

सहकारी ठगी प्रकरणमा उपप्रधानमन्त्री तथा गृहमन्त्री रवि लामिछानेमाथि अनुसन्धान गर्न संसदीय छानबिन समितिको माग गर्दै आएको कांग्रेसले संसदमा अवरोध जनाउँदै आएको छ। संसदीय छानबिन समिति बनाउन सत्ता पक्ष र प्रतिपक्ष सहमत भएपनि समितिको कार्यादेशमा टुंगो लाग्न सकेको छैन।

संसदीय छानबिन समितिको 'टीओआर' मा सहमति जुटाउन कार्यदलको बैठक पटक-पटक बस्दै आए पनि निष्कर्षमा पुग्न सकेको छैन। आज पनि कार्यदलको बैठक बस्ने भनिएको छ। तर, सहमतिको टुंगो छैन।

कार्यदलमा नेकपा एमालेका प्रमुख सचेतक महेश बर्तौला, नेपाली कांग्रेसका सह-महामन्त्री जीवन परियार र सांसद ज्ञानेन्द्रबहादुर कार्की तथा राष्ट्रिय स्वतन्त्र पार्टीका सांसद शिशिर खनाल छन्।

प्रकाशित मिति: शुक्रबार, जेठ ११, २०८१ १०:५७

प्रतिक्रिया दिनुहोस्