सुदूरपश्चिमका ६ जिल्लामा तीन दिनसम्म भीषण वर्षा हुने, 'रेड अलर्ट' जारी

समाज

गृहपृष्ठ
समाज

सुदूरपश्चिमका ६ जिल्लामा तीन दिनसम्म भीषण वर्षा हुने, 'रेड अलर्ट' जारी

क्यापिटल नेपाल बुधबार, भदौ २६, २०८१

काठमाडौं । मौसम पूर्वानुमान महाशाखाले बिहीबारदेखि शनिबारसम्म सुदूरपश्चिमका ६ जिल्लामा भीषण वर्षाको पूर्वानुमान गरेको छ।

मनसुनको न्यूनचापीय रेखा सरदर स्थानभन्दा दक्षिणतिर अवस्थित रहेको र भारतको मध्यप्रदेश आसपासमा न्यूनचापीय प्रणाली थप सक्रिय भई नेपालनजिक सर्ने सम्भावना देखिएसँगै पश्चिम नेपालमा ठूलो वर्षाको सम्भावना रहेको महाशाखाले जनाएको हो।

बिहीबार साँझदेखि शनिबार बिहानसम्म गण्डकी, लुम्बिनी, कर्णाली र सुदूरपश्चिमका धेरै स्थान तथा बाँकी प्रदेशका केही स्थानमा मेघगर्जन, चट्याङ र हावाहुरीसहित हल्कादेखि मध्यम वर्षाको सम्भावना रहेको महाशाखाले बुधबार विशेष बुलेटिन जारी गर्दै बताएको छ।

लुम्बिनी र सुदूरपश्चिम प्रदेशका थोरै स्थानमा भारीदेखि धेरै भारी तथा बाँकी प्रदेशका एक–दुई स्थानमा भारी वर्षाको चेतावनी महाशाखाले दिएको छ। सुदूरपश्चिम प्रदेशका एक–दुई स्थानमा अति भारी वर्षाको समेत सम्भावना छ। महाशाखाले सुदूरपश्चिमका ६ जिल्लामा रेड अलर्टसमेत जारी गरेको हो।

बुधबार राति गण्डकी, लुम्बिनी र सुदूरपश्चिम प्रदेशका केही स्थानहरू तथा बाँकी प्रदेशका थोरै स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ। कोशी, गण्डकी, लुम्बिनी र सुदूरपश्चिम प्रदेशका एक–दुई स्थानमा भारी वर्षाको पनि सम्भावना छ।

458116540_3737944029801143_5651483587337258985_n2024-09-11-03-48-33-1726052580.jpeg