चितवनलाई वन्यजन्तुको पर्यटकीय राजधानी बनाउन पर्यटन व्यवसायीको माग

समाज

गृहपृष्ठ
समाज

चितवनलाई वन्यजन्तुको पर्यटकीय राजधानी बनाउन पर्यटन व्यवसायीको माग

क्यापिटल नेपालसोमबार, पुस १, २०८१

काठमाडौँ। चितवनलाई जैविक विविधता तथा वन्यजन्तुको पर्यटकीय राजधानीको रूपमा घोषणा गर्न सौराहाका पर्यटन व्यवसायी लागि परेका छन्। यसका लागि रत्ननगर नगरपालिका र बागमती प्रदेश सरकारसँगको छलफल भइरहेको हो।

आगामी पुस ११ गतेदेखि सुरू हुने १८ औँ हात्ती तथा पर्यटन महोत्सव २०८१ को अवसरमा राजधानी घोषणा गर्ने गरी तयारी अघि बढाइएको क्षेत्रीय होटल संघ सौराहाले जनाएको छ। महोत्सवका संयोजक रामकुमार अर्यालका अनुसार महोत्सवको उद्घाटन समारोहमा राष्ट्रपति रामचन्द्र पौडेलले औपचारिक रूपमा घोषणा गर्ने कार्यक्रम छ।

यसका लागि रत्ननगर नगरपालिकाको बोर्ड बैठकले निर्णय गरेर प्रदेश सरकारले राष्ट्रपति समक्ष प्रस्ताव लगेपछि घोषणाको प्रक्रिया सुरू हुनेछ। यो प्रक्रिया सुरू गरिएको र महोत्सवको अवसरमा घोषणा हुने अपेक्षा गरिएको छ।

महोत्सवबारे जानकारी दिन आयोजित पत्रकार सम्मेलनमा संयोजक अर्यालले गत वर्षमा भएका हात्तीदौड तथा हात्तीका छावाको फुटवल प्रतियोगिता यस वर्ष हटाइएको बताए।

अहिले पर्यटक कम आउने समय भएकाले पर्यटकलाई आकर्षित गर्नका लागि महोत्सव गर्न लागिएको संघका अध्यक्ष गंगा गिरीले जानकारी दिए। उनका अनुसार कार्यक्रमबाट अहिले भइरहेका पर्यटकभन्दा ३० प्रतिशत बढी पर्यटक आउने अनुमान गरिएको छ।

अहिले सौराहाका होटलमा ३० प्रतिशत मात्र पर्यटक छन्। यसलाई बढाउन यो कार्यक्रम फलदायी हुने उनले बताए। हात्तीलाई पर्यटनसँग जोड्दा विदेशी पाहुनाको बसाइँ लम्ब्याउन सहज हुने उनको भनाइ छ।

प्रकाशित मिति: सोमबार, पुस १, २०८१ १६:०१

प्रतिक्रिया दिनुहोस्