एनपिएल उपाधि जित्न जनकपुर बोल्ट्सलाई १८५ रनको लक्ष्य

समाज

गृहपृष्ठ
समाज

एनपिएल उपाधि जित्न जनकपुर बोल्ट्सलाई १८५ रनको लक्ष्य

क्यापिटल नेपालशनिबार, पुस ६, २०८१

काठमाडौं। नेपाल प्रिमियर लिग (एनपिएल)को उपाधि जित्न सुदूरपश्चिम रोयल्सले जनकपुर बोल्ट्सलाई १८५ रनको लक्ष्य दिएको छ।

आज कीर्तिपुरस्थित त्रिवि मैदानमा टस जितेर पहिले ब्याटिङ गरेको सुदूरपश्चिमले ओपनर सबफ जइबको अर्धशतकको मद्दतमा ९ विकेटको क्षतिमा १८४ रन जोडेपछि जनकपुर बोल्ट्सलाई उपाधिका लागि १८५ रन आवश्यक पर्ने भएको हो।

जइबले ६९ रनको योगदान गर्दै ४३ बलमा ८ चौका र ३ छक्का प्रहार गरे। जइबले ६४ रन बनाएर खेलिरहँदा १२औं ओभरको दोस्रो बलमा जनकपुरका किशोर महतोको बलमा शेर मल्लले क्याच लिन खोजे तर सफल भएनन्। अन्तिम बलमा उनी ललित राजवंशीको हातबाट समातिए।

जबइले पहिलो विकेटका लागि विनोद भण्डारीसँग १२ ओभरमा ११७ रनको साझेदारी गरेपछि सुदूरपश्चिमले उत्कृष्ट सुरुआत गरेको थियो।
१५औं ओभरको अन्तिम बलमा सुदूरपश्चिमले तेस्रो विकेट गुमायो।

जनकपुरका मोहमद मोहसिनले हर्मित सिंहलाई १४ रनमा आउट गरे।
१६औं ओभरको अन्तिम बलमा ब्रान्डन माक्मलेन पनि १४ रनमा आउट भए। बलिङमा जनकपुरका मोहसिन र किशोरले ३–३ विकेट लिए।

सुदूरपश्चिमका कप्तान दीपेन्द्रसिंह ऐरीले ९ रन जोड्न सके। सुदूरपश्चिमले पछिल्लो पाँच ओभरमा ६ विकेट गुमाउँदा ४१ रन मात्र जोडेको थियो। पहिले १० ओभरमा विकेटबिनैको क्षतिमा ९७ रन जोडेको थियो।

प्रकाशित मिति: शनिबार, पुस ६, २०८१ १४:३५

प्रतिक्रिया दिनुहोस्