सिद्धार्थ कटेजको आयोजनामा दोस्रो मोमो महोत्सव हुँदै

समाज

गृहपृष्ठ
समाज

सिद्धार्थ कटेजको आयोजनामा दोस्रो मोमो महोत्सव हुँदै

क्यापिटल नेपाल बुधबार, पुस २४, २०८१

काठमाडौं। नेपालगञ्जस्थित सिद्धार्थ कटेजमा दोस्रो मोमो महोत्सव आयोजना हुने भएको छ। नयाँ वर्ष २०२५ को सुरुआतसँगै दोस्रो मोमो महोत्सव गर्न लागिएको हो।

सिद्धार्थ हस्पिटालिटीको आयोजामा पुस २५ देखि २७ गतेसम्म दोस्रो मोमो महोत्सव हुने कटेजका प्रबन्ध सञ्चालक पदम न्यौपानेले जानकारी दिए। सिद्धार्थले यसअघि विसं २०८० माघमा पहिलो मोमो महोत्सव आयोजना गरेको थियो।

पहिलो संस्करणमा ४० भन्दा बढी प्रकारका मोमो राखिएको भन्दै मोमोको परिकारलाई देशभरि चिनाउने उद्देश्यले दोस्रो संस्करणको महोत्सव आयोजना गर्न लागिएको उनको भनाइ थियो।

तीन दिनसम्म सञ्चालन हुने उक्त महोत्सवमा प्रत्येक दिन फरकफरक कलाकारको सांस्कृतिक प्रस्तुति रहने प्रबन्ध सञ्चालक न्यौपानेले बताए। पहिलो दिन स्थानीय कलाकारलाई प्राथमिकता दिँदै मोहिनी पौडेलसहितको टिमले नृत्य प्रस्तुत गर्नेछ भने दोस्रो दिन नेपालगञ्जको ‘लाइभ ब्याण्ड द समय ब्याण्ड’ सँगसँगै मोमो बनाउने र पकाउने प्रतियोगिता हुनेछ।

‘नाम दर्ता गर्न सिद्धार्थ कटेज नेपालगञ्जको शोधपुछ शाखामा गएर दर्ता गर्न सकिने छ,’ न्यौपानेले भने। अन्तिम दिन राष्ट्रिय कलाकार पशुपति शर्मासँगै स्थानीय कलाकारको प्रत्यक्ष दोहोरी, नृत्यसँगै सामुदायिक रूपमा मोमो पकाउने प्रतिस्पर्धा हुने उनले जानकारी दिए।

प्रकाशित मिति: बुधबार, पुस २४, २०८१ १७:५४

प्रतिक्रिया दिनुहोस्