सरस्वती पूजाका लागि मूर्ति बनाउन भ्याइनभ्याइ

समाज

गृहपृष्ठ
समाज

सरस्वती पूजाका लागि मूर्ति बनाउन भ्याइनभ्याइ

क्यापिटल नेपालआइतबार, माघ १३, २०८१

काठमाडौं। जनकपुरलगायत धनुषाको विभिन्न ठाउँमा सरस्वती पूजा नजिकिँएसँगै मूर्तिकारलाई सरस्वतीको मूर्ति बनाउन भ्याइनभ्याइ छ। फुर्सदमा हुने मानिस मूर्तिकारलाई नजिकिँदो सरस्वती पूजाले व्यस्त बनाएको हो।

यस वर्षको सरस्वती पूजा माघ २१ गते परेको छ। सोही पूजालाई लक्षित गरी मूर्ति बनाउन मूर्तिकार व्यस्त भएका हुन्। पूजामा प्रयोग गरिने मूर्तिको बिक्रीबाट अर्थोपार्जन गर्ने उद्देश्यले माटोबाट सरस्वतीको प्रतिमा बनाउन थालिएको मूर्तिकार चन्द्रदेव पण्डितले बताउँछन्।

मूर्तिकार रामकुमार मण्डलले यस वर्षका लागि ३५ वटा मूर्ति बनाइसकेको बताए। उनीसँग प्रतिगोटा तीन हजारदेखि १५ हजारसम्मका मूर्ति छन्। उनी ३५ वर्षदेखि मूर्ति बनाउँदै आएका छन्। ‘आवश्यकताअनुसार ठाउँठाउँमा पुगेर मूर्ति बनाउँदै आइरहेको छु,’ उनले भने।

अर्का मूर्तिकार चन्द्रदेव पण्डितको मुख्य पेसा मूर्ति बनाउने हो। सरस्वती पूजाका लागि पाँच हजारदेखि ३० हजारसम्मका मूर्ति बनाएर बिक्री गर्ने उनको भनाइ थियो। सरस्वतीको एउटा मूर्ति तयार गर्न करिब ४ जनालाई १० दिनसम्म लाग्ने उनको भनाइ छ।

यो समयमा मूर्तिबाट राम्रो आम्दानी लिने गरेको धनुषाका मूर्तिकार पञ्चा पण्डित बताउँछन्। सरस्वती पूजाको अवधिभरमा करिब १ लाख ५० हजारभन्दा बढीसम्मको आम्दानी गर्ने गरेको उनको भनाइ थियो। विशेषगरी दुर्गा पूजा, विश्वकर्मा पूजा, कृष्ण जन्माष्टमी र सरस्वती पूजाको समयमा मूर्तिको माग हुने गर्दछ।

प्रकाशित मिति: आइतबार, माघ १३, २०८१ १२:११

प्रतिक्रिया दिनुहोस्