विद्युत् महसुल नतिर्ने १३ सय ग्राहकको लाइन काटियो

समाज

गृहपृष्ठ
समाज

विद्युत् महसुल नतिर्ने १३ सय ग्राहकको लाइन काटियो

क्यापिटल नेपाल आइतबार, माघ १३, २०८१

काठमाडौं। नेपाल विद्युत् प्राधिकरण भरतपुर वितरण केन्द्रले १ हजार ३६८ जना ग्राहकको लाइन काटेको छ। समयमा विद्युत् महसुल नबुझाउने प्रयोगकर्ताको लाइन गत साउनयता काटिएको हो।

कार्यालयका प्रमुख ई. रामु श्रेष्ठका अनुसार साउनदेखि पुस मसान्तसम्म महसुल नतिर्ने उनीको लाइन काटिएको हो। यस अवधिमा १ हजार ४५६ जनाले बक्यौता रकम तिरेका छन्। उनीहरूबाट २ करोड ८२ लाख २१ हजार ९१६ राजस्व संकलन भएको छ।

कार्यालय प्रमुख श्रेष्ठका अनुसार १ हजार ६६८ जना ग्राहकबाट ४ करोड १३ लाख ९५ हजार ५६७ बक्यौता उठाउन बाँकी थियो। वितरण केन्द्रले पुस मसान्तसम्म २८१ जना ग्राहकलाई कालोसूचीमा राखेको छ।

उनीहरूबाट १ करोड ५ लाख ४६ हजार १८८ बक्यौता उठाउन बाँकी छ। वितरण केन्द्र प्रमुख श्रेष्ठले भने, “नेपाल विद्युत् प्राधिकरणको प्रचलित विनियमअनुसार ६ महिनासम्म महसुल नबुझाएका ग्राहकलाई कालोसूचीमा राख्ने प्रावधान छ।”

भरतपुर वितरण केन्द्रमा मासिक महसुल बुझाउने ग्राहकमध्ये ६२ प्रतिशतले अहिले अनलाइनबाट महसुल बुझाउने गरेका छन्। यस केन्द्रमा हाल ७२ हजार बढी ग्राहक छन्।

प्रकाशित मिति: आइतबार, माघ १३, २०८१ १४:००

प्रतिक्रिया दिनुहोस्