डेढ अर्ब लागतमा रारा रिसोर्ट निर्माण हुने, २ वर्षमा सञ्चालनमा आउने

पर्यटन

गृहपृष्ठ
पर्यटन

डेढ अर्ब लागतमा रारा रिसोर्ट निर्माण हुने, २ वर्षमा सञ्चालनमा आउने

क्यापिटल नेपालबिहीबार, फागुन १, २०८१

काठमाडौं। आगामी चैतदेखि अष्ट्रेलियन लगानीमा रारामा पहिलो लक्वरी रिसोर्ट निर्माण हुने भएको छ। २ वर्षभित्र निर्माण सम्पन्न गरी सञ्चालनमा ल्याउने उद्देश्यका साथ रिसोर्टको निर्माण सुरु हुन लागेको हो।

चैतको पहिलो साताबाट निर्माण सुरु गर्ने गरी बुधबार शिल्यान्यास गरिएको रारा होल्डिङका अभिषेशक विक्रम शाहले जानकारी दिए। निर्माणका लागि सम्पूर्ण तयारी पूरा भइसकेको बताउँदै चैतदेखि काम सुरु गरी २ वर्षमा सञ्चालनमा लयाउने गरी काम गर्न थालिएको बताए।

रिसोर्टमा ६० वटा कोठा रहने छ। तीमध्ये पहिलो चरणमा ४० र दोस्रो चरणमा २० वटा कोठा सञ्चालनमा आउने छ। १ अर्ब ५० करोड लगानीमा निर्माण हुने रिसोर्टमा एक्सपर्ट ग्रुपले अष्ट्रेलियन लगानी भित्र्याएको हो। स्वर्गकी रानीको उपमा पाएको नेपालकै उत्कृष्ट पर्यटकीय गन्तव्य रारा क्षेत्रमा पहिलो पटक विदेशी कम्पनी भित्रिएको हो।

मुगुको छायानाथ रारा नगरपालिका ९, मुर्माटपमा ७४ रोपनी क्षेत्रफलमा लक्जरी रिसोर्टमा बन्ने छ। रिसोर्ट वातावरणमैत्री र स्थानीय संस्कृति झल्किने नेपाली डिजाइनमा निर्माण गरिने र स्थानीयस्तरमा उपलब्ध स्रोत तथा साधनको अधिकतम प्रयोग हुने गरी नक्सा तयार पारिएको जनाएको छ।

यो रिसोर्ट कर्णाली प्रदेशकै पहिलो लक्जरी रिसोर्ट हो। समुद्र सतहदेखि ३ हजार ७०० मिटर उचाइमा निर्माण हुने रिसोर्टबाट रारा ताल र त्यस क्षेत्रका हिमालको उत्कृष्ट दृश्य देखिनुका साथै आसपासका क्षेत्रको दृश्यावलोकन गर्न सकिने छ।

प्रकाशित मिति: बिहीबार, फागुन १, २०८१ १३:२१

प्रतिक्रिया दिनुहोस्