रवि लामिछानेलाई जहाजबाट लगियाे रुपन्देही, सोमबार अदालत हाजिरीपछि जेल पठाइने

सहकारी

गृहपृष्ठ
सहकारी

रवि लामिछानेलाई जहाजबाट लगियाे रुपन्देही, सोमबार अदालत हाजिरीपछि जेल पठाइने

क्यापिटल नेपाल शनिबार, चैत २३, २०८१

काठमाडौं। रुपन्देहीको बुटवलस्थित सुप्रिम सहकारी ठगी प्रकरणमा जिल्ला अदालतको फैसला बदर गर्दै उच्च अदालत तुलसीपुरले थुना आदेश दिएसँगै राष्ट्रिय स्वतन्त्र पार्टीका सभापति रवि लामिछानेलाई जहाजबाट आज भैरहवा लगिएको छ।

उच्च अदालत तुलसीपुरबाट थुना आदेश आउनासाथ शुक्रबार बूढानीलकण्ठ निवासबाट पक्राउ गरेर जिल्ला प्रहरी परिसर काठमाडौं हिरासतमा राखिएका रविलाई आज जहाजबाट भैरहवा लगिएको हो। पूर्वगृहमन्त्रीसमेत रहेका रविलाई उच्च अदालतको आदेश कार्यान्वयनका लागि रुपन्देही पठाइएको प्रहरीले जनाएको छ।

उच्च अदालत तुलसीपुरको बुटवल इजलासले शुक्रबार लामिछानेलाई सुप्रिम सहकारी ठगी र संगठित अपराध मुद्दामा थुनामा पठाएर मुद्दाको पुर्पक्ष गर्न आदेश गरेको थियो। रविलाई आज र भोलि सार्वजनिक बिदा भएकाले सोमबार मात्रै कारागार पठाइने भएकाे छ।

बुटवलको सुप्रिम सहकारी प्रकरणमा जिल्ला अदालत रुपन्देहीले उनलाई १ करोड धरौटी माग गरेको थियो। उक्त धरौटी बदर माग गर्दै रविले उच्च अदालतमा रिट दायर गरेका थिए। तर, उच्च अदालतले जिल्लाको फैसला उल्टाएर रविलाई थुना पठाउने आदेश दिएसँगै काठमाडौंबाट रुपन्देही लगिएको हो।

रविलाई आज यती एयरलाइन्सको जहाजबाट भैरहवा लगिएको छ। रवि शनिबार र आइतबार जिल्ला प्रहरी कार्यालय रुपन्देहीको हिरासतमा रहने जिल्ला प्रहरी प्रमुख प्रहरी उपरीक्षक (एसपी) रञ्जितसिंह राठौरले बताए।

सरकारी बिदा हुँदा अदालत नखुल्ने भएकाले दुई दिन रविलाई जिल्ला प्रहरीकै हिरासतमा राखिनेछ। सोमबार अदालत खुलेपछि लामिछानेलाई अदालतमा हाजिर गराइनेछ। अदालतले थुनामा पठाउने अनुमति दिएलगत्तै कारागार चलान गरिनेछ।

प्रकाशित मिति: शनिबार, चैत २३, २०८१ ०९:२५

प्रतिक्रिया दिनुहोस्