काठमाडौं । बाग्मती नदीको सहायक नदी हनुमन्ते खोलाको वरिपरी करिडोर निर्माण कार्य ढिला नगर्न संसदीय विकास तथा प्रविधि समितीले निर्देशन दिएको छ । करिडोर निर्माण पछि जडीबुटी – कोटेश्वर सडकको जाम हटाउन सहयोगी हुने भन्दै चाडै बनाउँन समितिले आयोजनालाई निर्देशन दिएको हो ।
करिडोर निर्माणको काम अधिकार सम्पन्न बाग्मती सभ्यता एकीकृत बिकास समितिले तीन ओटा प्याकेज बनाएर गरिरहेको छ । समितीले आर्थिक वर्ष २०७५÷७६ मा राधेराधे पुल देखि र आव २०७६÷०७७ मा सल्लाघारी पुल देखि बालकुमारी पुलसम्म करिव ९ किलो मिटर नदी व्यवस्थापन गरी दुवै किनारामा ८ मिटर चौडा कालोपत्रे सडक, २ मिटर चौडा फुटपाथ र १० मिटर चौडा हरियाली क्षेत्र बनाउने आयोजना प्रमुख लिलाप्रसाद ढकालले बताए ।
उनका अनुसार करिडोर निर्माणको क्रममा खोलाले धार परिर्वतन गरी ब्यक्तिगत जग्गाबाट बगेको कारण समस्या आएका छन । उनले भने ‘समितीले जग्गा अधिकरण गरेर मुआब्जा दिन सक्ने स्थिती छैन । यसमा स्थानीय जनप्रतिनिधि तथा अन्य सबै सरोकारवाला निकायसँग समन्वय गरेर समस्या समाधान नगरे काम गर्न कठिन छ ।’
हनुमन्ते खोलाको पहिलो प्याकेजको काम भक्तपुरको राधेराधे पुल देखि चार दोबाटोपुलसम्म २ सय मिटर छ । करिडोर निर्माणको लागी २०७५ असार २७ गते पिएस गोल्ड समान्तर जेभीसँग ३० महिनाभित्र सम्पन्न गर्न ६९ करोड ७० लाख १८ हजारमा सम्झौता भएको थियो ।
पहिलो प्याकेजको हालसम्मको भौतिक प्रगति ७० प्रतिशत र वित्तीय प्रगति ६०.६८ प्रतिशत भएको छ । यो प्याकेजमा ८ मिटर चौडाइको ५८ मिटर सडक कालोपत्रे, ५८ मिटर तटबन्ध र सडकमा ट्राफिक संकेत बनाउने योजना छ ।
दोस्रो प्याकेज हनुमन्ते खोला सल्लाघारी पुल – राधेराधेपुल – वालकोट पुलसम्म २ सय मिटर रहेको छ । २०७६ कात्तिक २४ गते लामा सामान्तर जभीले ५६ करोड ६० लाख ३६ हजार लागतमा ३० महिनाभित्र सक्ने गरी सम्झौता भएको छ । यो प्याकेजको निर्माणकार्य ३० प्रतिशत सकिएको समितिले जनाएको छ ।
त्यस्तै, तेस्रो प्याकेजको काम बालकोटपुल देखि बालकुमारी पुलसम्म रहेको छ । यो प्याकेजको कालिका कन्ट्रक्कसन प्रालीले ५५ करोड ८९ लाख ६१ हजारको लागतमा ३० महिनाभित्र सम्पन्न गर्न २०७६ कात्तिक १ गते निर्माण कम्पनी र आयोजना समितीसँग सम्झौता भएको थियो ।
अहिले यो प्याकेजको काम पनि तिव्रगतिमा अगाडी बढेको छ । काम सुरु गरेदेखि अहिलेसम्म २५ प्रतिशत सकिएको समितिले बैठकमा जनाकारी दिएको छ । करिडोर निर्माणको लागी आर्थिक वर्ष २०७६÷०७७मा ५१ करोड २४ लाख रुपैयाँ विनियोजन गरेको छ ।
-1722932229.jpg)
