तनहुँ। उखरमाउलो गर्मीले वातावरण तातेको छ। केही दिनअघि पूर्वी क्षेत्रमा झुलुक्क देखिएको मसुसन त्यतै अड्किएको छ। पानी नपर्दा बाँकेको नेपालगञ्जमा त तापक्रम ४१ डिग्रीसम्म पुगेको छ। बढ्दो तापक्रमले घरबाहिर निस्कन पनि नसक्ने अवस्था छ।
त्यसैले त, देशका विभिन्न ठाउँबाट बढ्दो गर्मी छल्न मानिस त्रिशूली नदीमा र्याफ्टिङका लागि आउन थालेका छन्। काठमाडौँ तथा चितवनबाट गाडीमा दुई/तीन घन्टामै पुगिने त्रिशूली नदीमा र्याफ्टिङ गर्नेको संख्या केही दिनयता बढेको हो। र्याफ्टिङ मात्रै होइन, यतिबेला त्रिशूलीमा ‘क्लिफ जम्प’ गर्दै नदीको चिसो पानीमा रमाउनेहरु देखिन्छन्।
त्यसो त, यो र्याफ्टिङ लागि सबैभन्दा उपयुक्त समय पनि हो। लामो समयदेखि र्याफ्टिङ व्यवसाय सञ्चालन गर्दै आएका त्रिशूली रिभर साइड रिसोर्ट र त्रिशूली भिल्लाका सञ्चालक उद्धव कँडेल यतिबेला र्याफ्टिङका लागि आउनेको संख्या उल्लेख्य बढेको बताउँछन्।
‘र्याफ्टिङका लागि यो अनुकूल समय हो। बर्खा सुरु नभएकाले नदीमा पानीको सतह पनि बढेको छैन’, उनले भने, ‘पारिवारिक साहसिक गतिविधि भएकाले र्याफ्टिङ गर्नेहरु बढेका छन्।’ बिदाका दिन आउने, र्याफ्टिङ गर्ने र रिसोर्ट तथा भिल्लामा एक रात बिताउनेहरु बढेको उनको भनाइ छ।
उनका अनुसार त्रिशूलीमा खासगरी काठमाडौँ, चितवन, पोखरालगायतका सहरबाट मानिस आउने गरेका छन्। ‘कतिपय मानिस काठमाडौँ–चितवन–पोखराको यात्राका क्रममा पनि र्याफ्टिङ गरेर जाने हुन्छन्। त्यसबाहेक काठमाडौं र चितवनबाट प्याकेजमा र्याफ्टिङलगायतका गतिविधिका लागि आउनेहरु छन्’, उनले भने। यहाँ आउनेहरु गर्मी छल्ने मात्रै नभई नदीमाथि स्काई साइकलिङलगायतका गतिविधिका लागि पनि आउने गरेको उनको बुझाइ छ।
त्रिशूली नदीमा र्याफ्टिङ निकै सहज भएकाले काठमाडौँबाट चितवन वा पोखरा जाने जोकोहीले पनि बाटोमा र्याफ्टिङ गर्न सक्छन्। ‘ र्याफ्टिङ सबै उमेर समूहका लागि हो’, सञ्चालक कँडेलले भने।
र्याफ्टिङ गाइड मिथुन श्रेष्ठका अनुसार त्रिशूली नदी आफैँमा र्याफ्टिङ लागि प्रमुख गन्तव्य हो । परिवार तथा साथीहरुको समूहमा नदीमा र्याफ्टिङगर्दा र्यापिड (पानीको भंगालो) मा पैंठेजोरी खेल्दै जानुको अनुभव निकै रोमाञ्चक हुने उनको अनुभव छ। काठमाडौँबाट नजिकैको गन्तव्य र सहज यातायातको पहुँचका कारणले त्रिशूली र्याफ्टिङको प्रमुख गन्तव्य बनेको छ।
