काठमाडौं। राष्ट्रिय विपद् जोखिम न्यूनीकरण तथा व्यवस्थापन प्राधिकरणले केन्द्रदेखि स्थानीय तहसम्मका सबै निकायलाई मनसुन पूर्वतयारी तथा प्रतिकार्य राष्ट्रिय कार्ययोजना, २०८२ अनुसार विपद्को पूर्वतयारी सम्पन गरी कार्यान्वयनमा उत्रिन आग्रह गरेको छ।
यस वर्षको मनसुनमा देशका अधिकांश स्थानमा सरदरभन्दा बढी वर्षा हुने अनुमानलाई ध्यान दिँदै आ–आफ्नो जिम्मेवारी पूर्ण रुपमा निर्वाह गर्न सबैमा आग्रह गरिएको प्राधिकरणका प्रवक्ता रामबहादुर केसीले जानकारी दिए।
जल तथा मौसम विज्ञान विभागबाट जारी हुने मौसमको पूर्वानुमानसम्बन्धी बुलेटिन, बाढी तथा मौसमको पूर्वानुमानसम्बन्धी पूर्वसूचना तथा पूर्वचेतावनी, राष्ट्रिय विपद् जोखिम न्यूनीकरण तथा व्यवस्थापन प्राधिकरणलगायतका निकायबाट प्रवाह हुने पूर्वसूचना, पूर्वचेतावनी, सन्देशमूलक सूचना, जानकारीको पालना गरी सोअनुसार सतर्कता अपनाउन सबैमा अपिल गरिएको उनको भनाइ छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणको नेतृत्वमा बनेको मनसुन पूर्वतयारी तथा प्रतिकार्य राष्ट्रिय कार्ययोजना, २०८२ कार्यान्वयनका लागि संघीय सरकारका जिम्मेवार निकाय, प्रदेश सरकार, जिल्ला प्रशासन कार्यालय, स्थानीय तह, सुरक्षा निकायलगायत सरोकारवाला सबै निकायमा सम्प्रेषण भइसकेकाले जिम्मेवारी वहन गर्न पनि भनिएको उनले जानकारी दिए।
गत जेठ १५ रातीदेखि कोसी प्रदेशबाट प्रवेश गरेको यस वर्षको मनसुन पश्चिमतिर विस्तार हुँदै जेठ २९ बाट लुम्बिनीका पूर्वी भू–भागसम्म पुगेको छ।
सम्प्रेषित कार्ययोजनाका अतिरिक्त प्रदेश सरकार, जिल्ला प्रशासन कार्यालय, स्थानीय तह एवं विभिन्न विषयगत निकायले आ–आफ्नो मनसुन पूर्वतयारी तथा प्रतिकार्य योजना तर्जुमा गरी कार्यान्वयन गर्न सक्ने व्यवस्थाअनुसार अधिकांश निकायले योजना बनाइसकेको र केही निकाय बनाउने क्रममा रहेको जानकारी पाइएको प्राधिकरणले बताएको छ।
मनसुन पूर्वतयारी तथा प्रतिकार्य राष्ट्रिय कार्ययोजना, २०८२ अनुसार यस वर्षको मनसुन अवधिमा बाढीपहिरो, डुबान, भारी वर्षा, चट्याङजस्ता मनसुनजन्य विपदबाट देशभर करिब चार लाख ५७ हजार १४५ घरधुरीका १९ लाख ९७ हजार ७३१ जनसंख्या प्रभावित हुने आकलन प्राधिकरणको छ।
-1750076087.jpg)
