काठमाडौं। उपत्यका नजिकै पर्ने तारकेश्वर नगरपालिका–३ स्थित योग गन्तव्य साहसिक पर्यटकीय गन्तव्यका रूपमा स्थापित भएको छ। यहाँ ‘वनजंगल एडभेन्चर’ स्थापना भएसँगै साहसिक पर्यटकीय गन्तव्यका रूपमा विकास हुँदै गएको हो।
पर्यटनमा पछिल्लो साहसिक पर्यटनमा रूचि राख्नेको आगमन बढ्दै गएको छ। यहाँ जिपलाइन, रकक्लाइमिङ र बञ्जीजम्प गर्न उपत्यका बाहिरका विभिन्न ठाउँबाट आन्तरिक पर्यटक पुग्न थालेका हुन्। योसँगै काठमाडौँमा बसोबास गरिरहेकाले साहसिक पर्यटनका लागि टाढाटाढा जानुपर्ने बाध्यता अन्त्य भएको छ।
काठमाडौंकै रिङरोडभित्र बसोबास गर्नेका लागि साहसिक गन्तव्य रिङरोड बाइपासबाट १० किलोमिटरभित्र ककनी राजमार्गमा पर्ने पाँचमानेस्थित ‘वनजंगल एडभेन्चर’ बनेको छ । यहाँ पुगेपछि प्रकृतिको आनन्द र हरियाली वातावरणमा स्वच्छ हावा पनि लिन सक्नेछन्।
आठ महिनादेखि काठमाडौंभित्र रहेका र साहसिक पर्यटनमा रूचि राख्ने आन्तरिक तथा बाह्य पर्यटकलाई प्रकृतिसँगै नजिक राखेर सेवा दिँदै आइएको वनजंगल एडभेन्चरका सञ्चालक एलिसा ढकालले बताइन्। उनले काठमाडौँमा बसोबास गरिरहेकालाई प्रकृति र साहसिक पर्यटनप्रति रूचि बढाउन एडभेन्चर सञ्चालन गरिएको धारणा राखिन्।
हिजोआज साहसिक पर्यटनको ‘प्याकेज’ बनाएर आउनेको संख्या बढिरहेको भन्दै उनले एडभेन्चरले काठमाडौंभित्रका पर्यटकलाई लक्षित गरेर यो व्यवसाय सञ्चालन गरिरहेको बताइन्।
काठमाडौँका मानिस यहाँ आउँदा समयको बचत र जंगलभित्र सबै एडभेञ्चरको फरक महसुस गर्न पाउने भएकाले सेवाग्राहीको संख्या बढ्दै गइरहेको उनको भनाइ छ। ढकालका अनुसार ३० रोपनीमा फैलिएको वनजंगलमा सेवाग्राहीले जिपलाइन, रोलर कोस्टर, क्लाइमिङ वाल, अब्स्टयाक्ल कोर्ष, हाइरोप कोर्ष, किड्स एडभेन्चर्स कोर्ष जिपलाइन ट्रिपटप एडभेन्चर र जाइन्ट स्वीङको अनुभव लिन पाउनेछन्।
साहसिक पर्यटनका लागि नेपालमा पहिलोपटक रोलर कोस्टरको अनुभव लिन पाउने सञ्चालक ढकालले जानकारी दिइन्। फलाममा चक्का राखी बाँधेर छोड्ने गरिन्छ । पर्यटकले एक मिनेटसम्म फलामको डन्डामा घुमेर मनोरञ्जन लिन सक्नेछन्।
पर्यटकले टेन्ट र मौलिक नेपाली घरमा बसेर फरक अनुभूति गर्न सक्छन्। एडभेन्चरमा ११ टेन्ट र एक मौलिक घर रहेको छ।
मौलिकताको जगेर्ना गर्दै वनजंगल एडभेन्ञ्चरले मौलिक घरमा ढिकी, जाँतो, हलो तथा कृषकले प्रयोग गर्ने सामग्री देख्न पाइन्छ। शुक्रबार र शनिबार आन्तरिक पर्यटकको भीडभाड हुने गर्दछ। भारतीय अक्सो कन्सल्टेन्सीले एक वर्षको अवधिमा पूर्वाधार निर्माण गरेको र सबै पूर्वाधार पूर्ण रुपमा इञ्जिनिरियङ गरेर बनाइएको सञ्चालक ढकालले बताइन्।
‘वनजंगल एडभेन्चरको विशेषता भनेको साहसिक पर्यटन हो। यहाँ भएका अधिकांश खेल खेलाउन पर्यटन विभागबाट अनुमति लिएका छौं’, उनले भनिन्, ‘साहसिक खेलमा सहभागी प्रत्येक खेलाडीको बिमा गरिएको छ।’
जंगलको बीचमा कुल ६ करोड लागतमा आफ्नै जग्गामा पर्यटकीय पूर्वाधार निर्माण गरिएको ढकालले जानकारी दिइन्।
-1750138835.jpeg)
