चितवन राष्ट्रिय निकुञ्जभित्र जीप सफारी बन्द, बर्खा सकिनासाथ खुल्ने

पर्यटन

गृहपृष्ठ
पर्यटन

चितवन राष्ट्रिय निकुञ्जभित्र जीप सफारी बन्द, बर्खा सकिनासाथ खुल्ने

क्यापिटल नेपाल सोमबार, असार ९, २०८२

चितवन। चितवन राष्ट्रिय निकुञ्जभित्र असार १५ देखि जीप सफारी बन्द हुने भएको छ। वर्षासँगै निकुञ्जभित्र जीप आउजाउ असहज हुने भएकाले सफारी बन्द गरिएको हो।

निकुञ्जले हरेक वर्ष वर्षाको समय सफारी बन्द गर्दछ। वर्षा हटेसँगै चाडपर्व सुरु हुँदै गर्दा असोज तेस्रो सातातिर सफारी खुल्ने गर्दछ। वर्षा लम्बिँदा सोहीअनुसार खुल्ने समय पनि पछाडि सार्ने गरिन्छ। निकुञ्जका सूचना अधिकारी अविनाश थापामगरका अनुसार गत वर्ष असार १६ देखि बन्द भएको जीप सफारी असोज २४ फूलपातीदेखि पुनःसञ्चालनमा आएको थियो।

उनका अनुसार वर्षाले बिगारेको सडक मर्मतसम्भार गरेर जीप सफारी खुला गरिनेछ। निकुञ्जभित्र सफारी बन्द भए पनि मध्यवर्ती सामुदायिक वनमा भने जीप सफारी सञ्चालन हुने उनले बताए। निकुञ्जभित्र पैदलयात्रा, घडियाल प्रजनन केन्द्र अवलोकनलगायतका पर्यटकीय गतिविधि भने नियमित सञ्चालन हुने उनले जानकारी दिए।

निकुञ्जका प्रमुख संरक्षण अधिकृत डा. गणेश पन्तका अनुसार विश्वभरका यस्ता निकुञ्जमा हरेक वर्ष केही महिना सर्वसाधारणका लागि बन्द गर्ने गरिन्छ। त्यसका कारण निकुञ्जभित्रका वन्यजन्तुलाई बाधा नपुग्ने र जीपनयापन सहज हुने उनले बताए। वर्षायाममा बाढी आउने र खोला खोल्सा बढ्ने, रूख ढल्ने, बाटोसमेत चिप्लो र हिलो हुने, घाँस र झाँडी बढेर जंगली जनावरसमेत नदेखिने उनको भनाइ छ।

निकुञ्जभित्र सौराहा क्षेत्रबाट ३२, कसाराबाट १०, मेघौलीबाट सात र अमलटारीबाट पाँचवटा जीप निकुञ्जभित्र चल्ने गर्छन्।–रासस

प्रकाशित मिति: सोमबार, असार ९, २०८२ १३:४५

प्रतिक्रिया दिनुहोस्