सुनिल पौडेलविरुद्ध अर्को भ्रष्टाचार मुद्दा दर्ता, झण्डै १६ करोड बिगो दाबी

समाज

गृहपृष्ठ
समाज

सुनिल पौडेलविरुद्ध अर्को भ्रष्टाचार मुद्दा दर्ता, झण्डै १६ करोड बिगो दाबी

क्यापिटल नेपाल शुक्रबार, असार २७, २०८२

काठमाडौं। अख्तियार दुरुपयोग अनुसन्धान आयोगले राष्ट्रिय सूचना प्रविधि केन्द्रका पूर्वकार्यकारी निर्देशक सुनिल पौडेलमाथि फेरि अर्को भ्रष्टाचार मुद्दा दर्ता गरेको छ।

केन्द्रका लागि आर्थिक वर्ष २०७६/७७ मा हाइ कम्प्युट इन्फ्रास्ट्रक्चरसम्बन्धी योजनामा आपूर्ति, जडान तथा स्थापनासम्बन्धी ठेक्कामा मिलेमतो गरी १५ करोड ८८ लाख रूपैयाँ भ्रष्टाचार गरेको भन्दै उनीमाथि मुद्दा दायर भएको हो।

उनले गुरुयोजना नबनाई मिलेमतोमा स्पेसिफिकेसन तयार गरेको र ३१ करोड भ्याटसहित लागत अनुमान गरी बोलपत्र आह्वान गरेको अख्तियारले जनाएको छ।

उनले कान्तिपथस्थित वर्ल्ड डिस्ट्रिब्युसन नेपालको भ्याटसहित ३० करोड ६५ लाख ५५ हजारको बोलपत्र स्वीकृत गरी २०७६ माघ १५ गते खरिद सम्झौता गरेका थिए।

अख्तियारका अनुसार पौडेलसँगै राष्ट्रिय सूचना प्रविधि केन्द्रका तत्कालीन निर्देशक सफल श्रेष्ठ, सहायक निर्देशक रमेश पोख्रेल, कम्प्युटर इन्जिनियर रामशरण गायक, लेखा अधिकृत निमबहादुर वली र वर्ल्ड डिस्ट्रिब्युसन नेपाल प्रालिका अध्यक्ष तथा प्रबन्ध निर्देशक अरुण श्रेष्ठविरुद्ध पनि मुद्दा दर्ता गरिएको छ।

पौडेलविरुद्ध दायर भएको यो पाँचौँ भ्रष्टाटार मुद्दा हो।

प्रकाशित मिति: शुक्रबार, असार २७, २०८२ १५:११

प्रतिक्रिया दिनुहोस्