पाल्पा। पछिल्ला दिनमा सूचना प्रविधि प्रयोग दिनानुदिन बढ्दो छ। स्मार्ट फोन प्रयोगका अतिरिक्त सामाजिक सन्जाल चलाउने धेरै छन्।
प्रविधि सदुपयोग गरेर व्यावसायिक बन्ने किसानको संख्या पनि बढ्दो छ। पाल्पाका केही किसानलाई मोबाइलमा प्रविधिको प्रयोगबाट आत्मनिर्भर बन्नमा सहयोग पुगेको छ।
रिब्दीकोट गाउँपालिका–२ का टीकाबहादुर राना तीनैमध्येका एक हुन्। उनी बजारमा तरकारीको भाउ, आफुले बिक्री गरेको तयारीको विवरण मोबाइलबाटै थाहा पाउँछन्। कुन समयमा कुन तरकारी लगाउने, मल, खाद र सिँचाइ कसरी गर्ने, मौसम कस्तो हुँदै छ भन्ने जानकारी उनको मोबाइलमै प्राप्त हुन्छ।
उनलाई यी सबै जानकारी जियोकृषि नामक एप्सले उपलब्ध गराउँछ। उनले चार वटा टनेलमा टमाटर फलाउँदै आएका छन्। उत्पादित टमाटर सहकारीमार्फत बिक्री गर्छन्। केही समय अघिसम्म विवरण कागजमा राख्दा हराउने, दररेट र तौल फरक पर्ने हुन्थ्यो। अहिले त्यस्तो समस्या छैन।
रानाले भने, ‘हामीले तरकारी बिक्री गर्दा एउटा दररेट हुन्छ, पैसा लिने समयमा दररेट फरक भइदिन्थ्यो। कहिलेकाहीँ हामीले पनि विवरण बिर्सने भएकाले समस्या हुन्थ्यो तर अहिले त्यस्तो हुँदैन।’
रिब्दीकोट–२ कै तेजबहादुर रानाले मिलनसार सहकारीलाई ५० केजी टमाटर बिक्री गरे। बिक्री गरेको केही क्षणमै खरिद गरेको विवरण मोबाइलमा आयो। अहिले ५० केजी टमाटर ५० रुपैयाँको दरले बिक्री भएपसँगै पाँच हजार रकम लिन सहकारीमा आउनुहोला भन्ने मोबाइलमा सन्देश आएपछि राना दंग छन्।
उनी भन्छन्, ‘पहिला गाउँघरमै ग्राहकको भाउमा तरकारी बेच्थें। जियो कृषि एप्स चलाउन थालेपछि मेरो जीवनशैली परिवर्तन भयो।’
उनीहरुजस्ता यहाँका धेरै कृषकले सामाजिक उद्यमी महिला सहकारीको छाता संगठन सेवा नेपाल र जियो कृषिको साझेदारीमा सञ्चालन गरिएको जियो कृषि सेवा मोबाइल एप्लिकेसनमार्फत सेवा लिइरहेका छन्।
संकलन गर्ने प्रतिनिधि, भुक्तानी दिने सहकारी र बिक्री गर्ने कृषक सबैलाई एकैसाथ विवरण प्राप्त हुने र लामो समयसम्म अभिलेख सुरक्षित हुने भएकाले यो प्रविधिले कृषकलाई सहज बनाएको छ।
कृषकले जियो कृषि सेवामा आफ्नो उत्पादन अभिलेख राख्न सक्ने र सहकारीका प्रतिनिधिले उनीहरुको उत्पादन खरिद गर्न सक्ने हेफर इन्टरनेसनल नेपालका डिजिटल सहजकर्ता विष्णु घिमिरेले बताए। ग्रामीण कृषकको पहुँचमा डिजिटल प्रविधि पु¥याएर उनीहरुलाई थप सशक्त गर्ने उद्देश्यले यो कार्यक्रम लागू गरिएको उनको भनाइ छ।
हेफर इन्टरनेसनलको सहयोगमा ग्रामीण आर्थिक विकास सङ्घ रेडामार्फत एलएएलभीसी परियोजना सञ्चालन भएको छ। परियोजनाले तानसेन, रिब्दीकोट, पूर्वखोला, रम्भा र निस्दी गाउँपालिकामा तरकारी उत्पादन र बजारीकरणमा काम गर्दै आएको छ।
परियोजना क्षेत्र तथा अन्य क्षेत्रबाट समेत गरी मिलनसार सहकारीले दैनिक १० देखी १५ मेट्रिकटन तरकारी खरिद गरी बिक्री गर्दै आएको छ। ‘तरकारीको कारोबार कागजमा राख्दा अभिलेख नरहने र दररेट फरक पथ्र्याे’, सहकारीका अध्यक्ष कमला भण्डारीले भनिन्, ‘एप्समार्फत डिजिटल अभिलेख राख्दा सबैलाई फाइदा पुगेको छ। पारदर्शी हुनुका साथै बजार व्यवस्थापन र योजना निर्माणका लागिसमेत सहयोग पुगेको छ।’
हेफरका इनोभेसन प्रमुख ताराप्रसाद पन्थीका अनुसार ७० बढी सहकारीका सदस्यलाई डिजिटल सेवामा पँहुच पुर्याउन जियो कृषि सेवामार्फत सहयोग गर्दै आएको छ।
-1752477820.jpg)
