काठमाडाैं। भौतिक पूर्वाधार तथा यातायात मन्त्री देवेन्द्र दाहालले उपत्यकाको यातायात व्यवस्थापनका लागि निर्णायक कदम चाल्ने बेला आएको बताएका छन्।
उपत्यका संघीय राजधानी एवम् सांस्कृतिक विविधता र सम्पन्नतायुक्त क्षेत्र भएकाले यहाँको यातायात व्यवस्थापनलाई सहज र सुविधायुक्त बनाउनु पर्नेमा उनले जाेड दिए।
आइतबार ललितपुरमा आयोजित काठमाडौं उपत्यका सहरी यातायात प्रणाली गुरुयोजना परियोजनाको रणनीतिक वातावरणीय मूल्यांकन सम्बन्धि सरोकारवालाहरुको बैठकलाई सम्बाेधन गर्दै उनले काठमाडौं, ललितपुर र भक्तपुर जिल्लाहरु समेटिएको काठमाडौं उपत्यका नेपालको आर्थिक, सांस्कृतिक र प्रशासनिक गतिविधिको केन्द्र रहे पनि यहाँको यातायात प्रणाली निकै दबाबमा रहेको बताए।
सन् २०१२ मा बनेको र सन् २०१७ मा अद्यावधिक गरिएको पछिल्लो गुरुयोजना यता यातायातको अवस्था निकै बिग्रिएको र बढ्दो सवारी साधन, अव्यवस्थित शहरीकरण र अपर्याप्त पूर्वाधारका कारण गम्भीर ट्राफिक जाम, ढिलाइ र वायु प्रदूषण बढेको मन्त्री दाहालको ठम्याई छ। यसले गर्दा दैनिक यातायातलाई मात्र होइन, आर्थिक उत्पादकत्व र जनस्वास्थ्यलाई पनि प्रभावित पारि रहेकाले यसको व्यवस्थापनमा ढिलाई गर्न नहुने उनको भनाइ छ।
उनले भने,‘ यदि हामीले अहिले पनि निर्णायक कदम नचाले भने, अवस्था थप बिग्रनेछ, जसले उपत्यकाको बस्नयोग्यता र दिगोपनलाई खतरामा पार्नेछ। यो परियोजना छोटो र दीर्घकालीन समाधानहरू खोज्ने हाम्रो अन्तिम अवसर हुन सक्छ।’
कार्यक्रममा वन तथा वातावरण मन्त्री ऐनबहादुर शाहीले उपत्यकाको यातायात व्यवस्थापनका लागि गर्नुपर्ने सहयोग र समन्वयका लागि मन्त्रालय तयार रहेको बताए। भौतिक मन्त्रालयका सचिव केशवकुमार शर्माले जिवन्त र सास्कृतिक काठमाडौं उपत्यकाको लागि दिगो, सुरक्षित र समावेशी यातायातका लागि बहुपक्षीय समन्वयको आवस्यकता रहेको बताए। यस्तै, विभिन्न विज्ञहरुले अवधारणा पत्र प्रस्तुत गरेका थिए।
-1754202908.jpeg)
