दार्चुलामा महालक्ष्मी बैंकको करोडौं रकम अनलाइन जुवामा, चार कर्मचारी पक्राउ

बैंकिङ

गृहपृष्ठ
बैंकिङ

दार्चुलामा महालक्ष्मी बैंकको करोडौं रकम अनलाइन जुवामा, चार कर्मचारी पक्राउ

क्यापिटल नेपाल आइतबार, साउन २५, २०८२

काठमाडाैं। महालक्ष्मी विकास बैंकको दार्चुला शाखामा कार्यरत चार कर्मचारीले दुई करोड ८४ लाख रुपैयाँभन्दा बढी रकम हिनामिना गरी ‘वान एक्स बेट’ अनलाइन जुवामा प्रयोग गरेको आरोपमा पक्राउ परेका छन्। बैंकको शैल्यशिखर नगरपालिका–९ गोकुलेश्वर शाखामा कार्यरत चार कर्मचारीलाई ठूलो रकम हिनामिनाको आरोपमा प्रहरीले पक्राउ गरेको हो।

पक्राउ पर्नेमा तत्कालीन शाखा प्रबन्धक सागर शाही, निर्मला साउद, धनन्जय पन्त र अम्बादत्त पन्त रहेका छन्।जिल्ला प्रहरी कार्यालय दार्चुलाका प्रहरी नायब उपरीक्षक (डीएसपी) प्रकाश दाहालका अनुसार बैंकको उजुरीका आधारमा उनीहरूलाई नियन्त्रणमा लिइएको हो। अदालतबाट सात दिनको म्याद थप गरी हाल अनुसन्धान भइरहेको छ।

प्राथमिक अनुसन्धानमा चारै जनाको मिलेमतोमा बैंकको करिब रु २ करोड ८४ लाख ७६ हजार ७ सय रकम अपचलन भएको पुष्टि भएको दाहालले बताए। उक्त रकम नेपालमा प्रतिबन्धित अनलाइन जुवा प्लेटफर्म ‘वान एक्स बेट’ मा प्रयोग गरिएको बैंकको आन्तरिक छानबिनबाट खुलेको हो।

बैंकका कर्मचारीहरूले भल्टमा रकम मौज्दात देखाए पनि वास्तवमा सो रकम अनधिकृत रूपमा जुवामा लगानी गरिएको पाइएको छ। घटनापछि बैंकले चारै जनालाई निलम्बन गरेको छ। हाल शाखा सञ्चालनको जिम्मा हेमराज जोशीलाई दिइएको छ। जोशीका अनुसार आजदेखि शाखा पूर्ववत् रूपमा सञ्चालनमा आएको छ।

प्रकाशित मिति: आइतबार, साउन २५, २०८२ २२:१४

प्रतिक्रिया दिनुहोस्