काठमाडौं। गाई भैँसीमा लाग्ने रोग ‘लम्पी स्किन’को संक्रमण कोशी प्रदेशमा बढेपछि गोठमै पुगेर खोप लगाउने अभियानलाई तीव्र बनाइएको पशुपन्छी तथा मत्स्य विकास निर्देशनालय विराटनगरले जनाएको छ।
गर्मी बढेसँगै ‘लम्पी स्किन’ रोगको संक्रमण महामारीको रुपमा फैलिएपछि कोशीका १४ जिल्लामा तीन लाख ३७ हजार ३०१ पशुलाई निःशुल्क खोप लगाइएको निर्देशनालयका सूचना अधिकारी तथा पशु चिकित्सक विनोदकुमार साहले जानकारी दिए।
झापा, इलाम, मोरङ, सुनसरी, धनकुटा, उदयपुर, ताप्लेजुङ, पाँचथर, भोजपुर र खोटाङमा ‘लम्पी स्किन’ रोगको संक्रमण फैलिएको छ। उनका अनुसार कोशीमा हालसम्ममा २४ हजार ८६१ पशु लम्पी स्किन रोगबाट संक्रमित भएका छन् भने ७६९ मरिसकेका छन्।
उनले गत वैशाखदेखि हालसम्म झापामा ९९ हजार ६७४, मोरङमा ६२ हजार १९९, सुनसरीमा ६४ हजार ४४१, उदयपुरमा १५ हजार ७३०, इलाममा ४१ हजार २८६, खोटाङमा चार हजार २९१, भोजपुरमा आठ हजार ६१५, ताप्लेजुङमा पाँच हजार ३५०, धनकुटामा १२ हजार १७५ र पाँचथरमा नौ हजार ७९४ पशुमा ‘लम्पी स्किन’विरुद्धको खोप दिइएको बताए।
यो रोग लागेका गाईगोरुमा उच्च ज्वरो आउने, शरीरका विभिन्न भाग तथा भित्री तहमा गाँठागुठी देखिने, गाँठागुठीमा घाउ भएर पिप र रगत बग्ने गर्दछ। यसबाट सङ्क्रमित पशु अन्त्यमा मर्ने गरेका छन्।
सूचना अधिकारी साहले रोग लागेको पशुलाई अलग्गै राख्ने, जुठो नखुवाउने जस्ता सुरक्षाका विधि अबलम्बन गर्न पशुपालकहरुलाई आग्रह गरे।
-1755098348.jpg)
