काठमाडौं। युक्रेनका राष्ट्रपति भोलोदिमर जेलेन्स्कीले युद्ध अन्त्य गर्न आफ्ना रूसी समकक्षी भ्लादिमिर पुटिनसँग प्रत्यक्ष भेट गर्न इच्छुक रहेको बताएका छन्।
ह्वाइट हाउसमा अमेरिकी राष्ट्रपति डोनाल्ड ट्रम्प र धेरै युरोपेली नेतासँगको वार्तापछि पत्रकारसँग कुरा गर्दै जेलेन्स्कीले करिब साढे तीन वर्षअघि मस्कोको आक्रमणपछि पहिलो पटक पुटिनसँग आमनेसामने हुन तयार रहेको बताएका हुन्।
‘मैले पुष्टि गरेँ, र सबै युरोपेली नेताहरूले मलाई समर्थन गर्नु भयो, हामी पुटिनसँग द्विपक्षीय बैठकका लागि तयार छौँ,’ शिखर सम्मेलनपछि जेलेन्स्कीले भने।
ह्वाइट हाउसको बैठकअघि, ट्रम्पले युक्रेनलाई क्रिमिया त्याग्न र नाटोमा सामेल हुने आफ्नो लक्ष्य छोड्न दबाब दिएका थिए।
यी दुवै पुटिनका प्रमुख माग हुन्। तर, जेलेन्स्कीले ट्रम्पलाई युद्धको अवस्थाबारे स्पष्ट चित्र प्रस्तुत गर्न सक्षम भएका थिए। उनले ओभल अफिसमा ट्रम्पसँग एक्लै भेट गरेका थिए।
‘यो हाम्रो बैठकहरुमध्ये सबैभन्दा राम्रो थियो,’ जेलेन्स्कीले आफ्नो कार्यालयले जारी गरेको विज्ञप्तिमा भने, ‘मैले नक्सामा समेत सबै अमेरिकी सहकर्मीलाई युद्धको मैदानको अवस्थाबारे धेरै कुरा देखाउन सकेँ।’
युक्रेनलाई क्षेत्रीय छुट दिनुभन्दा बरु शिखर सम्मेलन सुरक्षा ग्यारेन्टीको व्यवस्थामा केन्द्रित भएको फ्रान्सेली राष्ट्रपति इमानुएल म्याक्रोनले पत्रकारलाई जानकारी दिए।
ट्रम्पले पनि ‘संयुक्त राज्य अमेरिकासँगको समन्वयमा विभिन्न युरोपेली देशहरूले ग्यारेन्टी प्रदान गर्ने’ बताए।
