अतिक्रमित लिपुलेकबाट सीमा व्यापार खोल्ने भारत–चीनको सम्झौता, नेपालको चासोलाई बेवास्ता

अन्तर्राष्ट्रिय

गृहपृष्ठ
अन्तर्राष्ट्रिय

अतिक्रमित लिपुलेकबाट सीमा व्यापार खोल्ने भारत–चीनको सम्झौता, नेपालको चासोलाई बेवास्ता

क्यापिटल नेपालबुधबार, भदौ ४, २०८२

चिनियाँ विदेशमन्त्री वाङ यी र भारतीय समकक्षी एस जयशंकर। तस्बिर, एजेन्सी

काठमाडौं। छिमेका दुई शक्तिशाली मुलुकले नेपालको निर्णयबिनै भारतबाट अतिक्रमित लिपुलेक हुँदै व्यापार गर्ने सम्झौता पुनः ब्युँताएका छन्।

यसअघि २०७२ मा भारत र चीनका प्रधानमन्त्रीबीचको सहमतिमा लिपुलेक पासबाट व्यापार गर्ने उल्लेख भएपछि प्रधानमन्त्री सुशील कोइरालाको सरकारले यसमा चासो र चीन–भारतलाई कूटनीतिक नोट पठाएर विरोध गरेको थियो।

तर, नेपालको विरोध हुँदाहुँदै पनि दोस्रोपल्ट भारत–चीनले अतिक्रमित नेपाली भूमि लिपुलेक पासबाट हुने गरी व्यापार खोल्ने सहमति गरेका हुन्।

भारत भ्रमणमा रहेका चिनियाँ विदेश मन्त्री वाङ यी र भारतीय समकक्षी एस जयशंकरबिच भएको १२ बुँदे समझदारीअन्तर्गत लिपुलेक पासबाट व्यापार खोल्न ‘द्विपक्षीय सहमति’ भएको अन्तर्राष्ट्रिय सञ्चार माध्यममा उल्लेख छ। लिपुलेक नेपालको उत्तर–पश्चिमी सिमाना लिम्पियाधुराबाट नजिकको भूभाग हो।

भदौ २ र ३ गते चिनियाँ विदेशमन्त्री यीले भारत भ्रमण गरेका बेला भएको १२ बुँदे समझदारी भारतीय विदेश मन्त्रालयले सार्वजनिक गरेको छ। सम्झौताको ९ नम्बर बुँदामा भनिएको छ, ‘दुवै पक्ष लिपुलेक पास, शिप्की–ला पास र नाथु–ला पास नामक तीन तोकिएका व्यापारिक नाकामार्फत सिमानापार व्यापार पुनः खोल्नेबारे सहमति जनाएका छन्।’

प्रकाशित मिति: बुधबार, भदौ ४, २०८२ १३:३४

प्रतिक्रिया दिनुहोस्