सिरहामा लाखौँ भन्सार छलीका सामानसहित गाडी नियन्त्रण

समाज

गृहपृष्ठ
समाज

सिरहामा लाखौँ भन्सार छलीका सामानसहित गाडी नियन्त्रण

क्यापिटल नेपालबिहीबार, भदौ ५, २०८२

सिरहा। सशस्त्र प्रहरी बल, नेपाल नम्बर ७ गण सिरहाअन्तर्गतको गस्ती टोलीले भन्सार छलीका सामानसहित बोलेरो गाडी नियन्त्रणमा लिएको छ।

बुधबार राति करिब साढे ९ बजे मिर्चैया नगरपालिका ९ घुर्मी पुलस्थित पूर्व-पश्चिम राजमार्गमा जाँच गर्ने क्रममा सशस्त्र बेश क्याम्प मिर्चैयास्थित सशस्त्र प्रहरी निरीक्षक अनिल खड्काको कमाण्डमा खटिएको गस्ती टोलीले स १ च १०४८ नम्बरको सिंगल क्याप बोलेरो गाडी नियन्त्रणमा लिएको हो।

गाडीमा बिलबिजक नभएको चिनी ४० बोरा, कविर सुर्ती २० बोरा र केराउ पाँच बोरासमेत गरी करिब तीन लाख २३ हजार मूल्य बराबरको सामान फेला परेको सशस्त्र प्रहरी नम्बर ७ गणका प्रमुख सशस्त्र प्रहरी उपरीक्षक नरेश भण्डारीले जानकारी दिए। उनका अनुसार सो बोलेरो गाडीको मूल्य नौ लाख ५० हजार रहेको र सामानसहित जम्मा १२ लाख ७३ हजार बराबर रहेको छ।

साथै, गाडी चालक उदयपुरको कटारी नगरपालिका १३ मयाङखु बस्ने २१ वर्षीय सागर खत्रीलाई समेत नियन्त्रणमा लिइएको सशस्त्र प्रहरी उपरीक्षक भण्डारीले जानकारी दिए।

नियन्त्रणमा लिइएको सामान तथा गाडी भन्सार कार्यालय बुझाउने प्रक्रिया भइरहेको सशस्त्र प्रहरीले जनाएको छ।

प्रकाशित मिति: बिहीबार, भदौ ५, २०८२ १३:२०

प्रतिक्रिया दिनुहोस्