म्याग्दी। जिल्लाबाट वार्षिक २५० परिवारका दरले अन्यत्र बसाइँसराइ गरेर जाने गरेका छन्।
स्थानीय तहका पञ्जीकरण शाखाको अभिलेखअनुसार जिल्लाभरका पालिकामा बसाइँसराइ गरेर आउने परिवारको संख्या भने वार्षिक एक सयको हाराहारी छ। बढ्दो बसाइँसराइका कारण ग्रामीण क्षेत्रको सामाजिक, सांस्कृतिक, विकास गतिविधिमा असर पर्नुका साथै विद्यालयमा विद्यार्थी अभाव हुन थालेको छ।
आर्थिक वर्ष २०८१÷८२ मा म्याग्दीका स्थानीय तहमा ८९ परिवार बसाइँसराइ गरेर आउँदा दुई सय ४७ परिवारले थातथलो छाडेर अन्यत्र गएका छन्। आव २०८०÷८१ मा दुई सय ५२ परिवार बसाइँसराइ गरेर जाँदा आउने परिवारको संख्या एक सय भएको स्थानीय तहको पञ्जीकरण शाखाको अभिलेखमा उल्लेख छ।
गत वर्ष बसाइँसराइ गरेर आउनेहरूको परिवार संख्या बेनी नगरपालिकामा ४५, धवलागिरिमा तीन, मालिकामा आठ, मंगलामा १९, रघुगंगामा चार र अन्नपूर्णमा १० छ। बेनीबाट ६५, धवलागिरिबाट २३, मालिकाबाट ३९, मङ्गलाबाट ५५, रघुगंगाबाट २१ र अन्नपूर्णबाट ४४ परिवारले बसाइँसराइ गरेर अन्यत्र गएका छन्।
म्याग्दी बहुमुखी क्याम्पस समाजशास्त्र विषयका प्राध्यापक गोरखबहादुर जिसीले गण्डकी प्रदेशको म्याग्दी, स्याङ्जा र पर्वतको बसाइँसराइ उल्टो रहेको बताए। ‘गाउगाउँमा पुगेको सडक, विद्युत्, खानेपानी, सञ्चार सुविधाले मानिसलाई रोक्न सकेको छैन’, उनले भने, ‘रोजगारी र आयआर्जन अवसरको खोजीमा गाउँबाट सहर र सुविधा भएको ठाउँमा मानिस बसाइँसराइ गर्ने क्रम बढेको हो।’
२०७८ मा भएको जनगणनाको नतिजाअनुसार म्याग्दीको २५ हजार ३७४ घरमा २९ हजार २४२ परिवारका एक लाख सात हजार ३७२ जनसंख्याको बसोबास छ।
२०६८ मा म्याग्दीको कुल जनसंख्या एक लाख १३ हजार ६४१ जना थियो। विशेषगरेर ग्रामीण क्षेत्रमा युवा उमेर समूहका उत्पादनशील जनशक्ति नहुँदा विवाहमा जन्ती, मृत्युमा मलामी जानेहरू प्रौढ र वृद्धहरू बढी देखिन थालेका धवलागिरि गाउँपालिका–४ का चित्र पुनले बताए।
‘खेतीबाली लगाउन अर्मपर्म गर्ने चलन हरायो’, उनले भने, ‘खेतीयोग्य जमिन बाँझिएको छ। आयातीत खाद्यान्नमा निर्भरता बढेको छ।’
जन्मदर कम भएको र गाउँमा भएकाले पनि आर्थिक हैसियत बढेपछि छोराछोरी पढाउन बजार झर्ने क्रमसँगै विद्यार्थी संख्या घटेको अन्नपूर्ण गाउँपालिका–७ को टिकोट माविका प्रअ प्रदीप पुनले बताए। कक्षा १० सम्म पठनपाठन हुने उक्त विद्यालयमा करिब ५० जना मात्र विद्यार्थी छन्।
म्याग्दीबाट कास्कीको पोखरा, हेम्जा, काठमाडौं, चितवन, बुटवल र तनहुँमा बसाइँसराइ गरेर जाने गरेका छन्। सम्पन्नले बजारमा घरघडेरी किनेर झरेका छन् भने विपन्न काम र मामका लागि बजार झर्ने क्रम देखिएको प्राध्यापक जिसीको भनाइ छ।
बेनी नगरपालिकाका प्रमुख सुरत केसीले विकास गाउँतिर केन्द्रित भएको समय त्यसको उपभोग गर्ने जनसंख्या भने सहरबजार झर्ने र बिदेसिने अवस्था चुनौती रहेको बताए।–रासस
