अब नेपालमा युवाको उमेर १८ देखि ३५ वर्षसम्म हुने

समाज

गृहपृष्ठ
समाज

अब नेपालमा युवाको उमेर १८ देखि ३५ वर्षसम्म हुने

क्यापिटल नेपालबिहीबार, भदौ १२, २०८२

काठमाडौं। आगामी दिनमा युवाको उमेर अब १८ देखि ३५ सम्म कायम हुने भएको छ। सरकारले हालै ‘राष्ट्रिय युवा नीति २०८२’ स्वीकृत गरेसँगै युवाको उमेर १८-३५ कायम हुने राष्ट्रिय युवा परिषद्का कार्यकारी उपाध्यक्ष सुरेन्द्र बस्नेतले जानकारी दिए।

यसअघि ‘राष्ट्रिय युवा नीति २०७२’ अनुसार युवाको उमेर १६-० वर्ष रहेको थियो। सरकारले नयाँ युवा नीति जारी गरेको हो। राष्ट्रिय युवा नीतिमा ‘राष्ट्रिय तथा अन्तर्राष्ट्रिय परिवेश अनुकुल हुने गरी नेपालको सन्दर्भमा १८ देखि ३५ वर्षको उमेर समूहको जनसङ्ख्यालाई युवा मानिने छ’, भनेर उल्लेख छ।

२०७८ सालको जनगणना अनुसार नेपालमा १६ देखि ४० वर्ष जनसंख्या ४२.५६ प्रतिशत थियो। परिषद्का कार्यकारी उपाध्यक्ष बस्नेतले अब नयाँ युवा नीति अनुसारको युवाको जनसंख्या निकाल्न आग्रह गरिएको बताए।

बालबालिकासम्बन्धी ऐनमा बालबालिकाको उमेर १८ सम्म भएको हुनाले १८ वर्षदेखि ३५ उमेर समूहलाई युवामा राखिएको उनको भनाइ छ। संयुक्त राष्ट्रय संघले १५ देखि २४ वर्ष उमेर समूहलाई युवा भनेर परिभाषा गरेको छ। भारतमा १५ देखि २४ वर्षको उमेर समूहलाई युवा मान्दै आएको छ।

परिषद्का उपाध्यक्ष बस्नेतले ‘राष्ट्रिय युवा परिषद् ऐन-२०७२’ संशोधन नभएसम्म युवाको उमेर कानूनी रुपमा भने १६ देखि ४० वर्ष हुने बताए। ‘युवा नीति अनुसार ऐन संशोधन गर्नु पर्दछ,’ उनले भने।

हरेक पाँच/पाँच वर्षमा युवा नीति परिमार्जन गर्नुपर्ने भए पनि १० वर्षपछि नीति संशोधन गरिएको हो।

प्रकाशित मिति: बिहीबार, भदौ १२, २०८२ १४:१०

प्रतिक्रिया दिनुहोस्