काठमाडौं। नेपालले भैंसीको मासु, दुग्ध पदार्थ, तरकारी, फलफूल र जडीबुटी चीन निर्यातका लागि भन्सार प्रशासनमा सहजीकरण एवं लचकता अपनाउन चीनसमक्ष आग्रह गरेको छ।
चीनको भन्सार प्रशासन र कृषि तथा पशुपन्छी मन्त्रालयका उच्च अधिकारीबीच काठमाडौंमा भएको द्विपक्षीय बैठकमा नेपालले गरेको आग्रहलाई चिनियाँ पक्षले सकारात्मक रुपमा लिएको छ।
बैठकमा नेपालको नेतृत्व कृषिमन्त्री रामनाथ अधिकारी र चीनको नेतृत्व चीनको भन्सार प्रशासनका उपमन्त्री वाङ लिङजुनले गरेका थिए।
नेपालबाट थर्मल रुपमा प्रशोधित भैंसीको मासु र भैंसीको कार्टिलेज (कुरकुरे हाड) निर्यातका अलावा दुग्ध पदार्थ विशेषगरी घ्यू, नौनी, बटर तथा छुर्पी चीन निर्यातका लागि कृषि मन्त्रालयले जोड गरिरहेको छ। त्यस्तै, हेलेज साइलेज पशु आहार निर्यातका लागि पनि द्विपक्षीय बैठकमा नेपालले कुरा राखेको छ।
नेपालले कुखुराको मासु र पञ्जा, तरकारी, सुन्तलाजन्य फलफूल, चिया तथा कफी र जडीबुटी निर्यातका लागि सक्षम रहेको र यसका लागि थप सहजिकरण गरिदिन पनि आग्रह गरेको छ।
हाल नेपालबाट ३४ प्रकारका कृषि वस्तु ६१ वटा कम्पनीमार्फत निर्यात हुँदै आएको छ। त्यस्तै, हरियो घाँस हेलेज ५ वटा कम्पनीमार्फत चीन निर्यात हुँदै आएको छ। नेपालले पशु आहार साइलेज निर्यातका लागि पनि चीन सँग प्रस्ताव गरेको छ।
बैठकमा चीनका भन्सार प्रशासनका उपमन्त्री वाङले चीनले नेपालबाट कृषि वस्तु निर्यातको विषयलाई उच्च महत्त्व दिएको बताए। ‘सय बढी देशबाट यस्ता प्रस्ताव आउने गरे पनि छिमेकी मुलुकको रुपमा नेपाललाई महत्त्व दिएर प्रयास अघि बढाएका छौं’, उनले भने।
कृषिमन्त्री अधिकारीले नेपालबाट मासु निर्यातका लागि आधारभूत सर्त खोरेतमुक्त क्षेत्र घोषणा गर्नेलगायतका प्रकृयादेखि चीनको क्वारेन्टाइन मापदण्ड पूरा गर्न प्रयास भइरहेको र सुन्तला जातका फलफूल निर्यातका केही सर्तमा लचकता अपनाइदिनसमेत चिनियाँ पक्षलाई आग्रह गरेका थिए।
द्विपक्षीय बैठकमा नेपालको कृषि उपज निर्यात सहजीकरण गर्न दुवै मुलुकको संयुक्त संरचना स्थापनाका लागि गरिएको प्रस्तावमा चिनियाँ पक्षले सहमति जनाएको मन्त्रालयले बताएको छ।
बैठकमा मन्त्रालयका सचिवद्वय डा. गोविन्दप्रसाद शर्मा, डा. दीपककुमार खराल र सहसचिव र चिनियाँ टोलीमा चीनको भन्सार प्रशासनका अधिकारी सहभागी थिए।
