काठमाडौं। नेपाल इलेक्ट्रिक पावर एन्ड लाइटस् तथा नेपाल कन्जुमर इलेक्ट्रोनिक्स एन्ड होम अपलायनसेस अन्तर्राष्ट्रिय प्रदर्शनीको चौथो संस्करण आजदेखि भृकुटीमण्डपमा सुरु भएको छ।
मिडिया स्पेस सोल्युसनस्, फ्युचरेक्स ट्रेड फेर एन्ड इभेन्ट्स, तथा एक्जिबीसन एन्ड ट्रेड सर्भिसेस इन्डियाले सयुक्त रुपमा आयोजना गरेको प्रदर्शनीको सहयोगी संस्था विद्युत प्राधिकरण तथा नेपाल सौर्य विद्युत उत्पादक संघ रहेका छन्।
प्रदर्शनीमा स्वदेशी तथा विदेशी कम्पनीका १०० बढी स्टल र अत्याधुनिक एवं नवीनतम् प्रविधिका ट्रान्समिसन तथा डिष्ट्रिब्युसन सामग्री, उर्जा आपूर्ति तथा कन्ट्रोल डिभाइस्, हाउस वायरिङका सामग्री, तार, केबुल एवं कन्डक्टर, स्वीच, एलइडी लाइटिङ, इलेक्ट्रोनिक्स उपकरण, घरेलु विद्युतीय उपकरण, चार्जिङ स्टेसन, ब्याट्री, कार्यालयमा प्रयोग हुने विद्युतीय प्रविधि तथा अन्य विद्युतीय सामग्रीका कम्पनीको सहभागिता छ।
प्रदर्शनी उद्घाटन गर्दै उद्योगमन्त्री दामोदर भण्डारीले नेपालमा उत्पादित विद्युत् तथा विद्युतीय सामग्री निर्यातमा अपार सम्भावना रहेको बताए।
भण्डारीले प्रदर्शनीमा विभिन्न राष्ट्रिय तथा अन्तर्राष्ट्रिय ब्रान्डको सहभागिता देख्दा नेपालमा पनि ऊर्जा तथा यससँग सम्बन्धित उत्पादनको सम्भावना निकै राम्रो रहेको धारणा व्यक्त गरे।
आन्तरिक र अन्तर्राष्ट्रिय व्यापारको सहजीकरण एवं प्रवर्द्धनका लागि प्रदर्शनी आयोजना गरिएको हो। प्रदर्शनीमा ग्राहकले सहज तथा सुलभ रुपमा विभिन्न राष्ट्रिय तथा अन्तर्राष्ट्रिय ब्रान्डका सामान खरिद गर्न सक्नेछन्।
राष्ट्रिय एवं अन्तर्राष्ट्रिय इलेक्ट्रिक, इलेक्ट्रोनिक्स, सञ्चार एवं सूचना प्रविधि, तथा विद्युतीय एवं वैकल्पिक ऊर्जा उद्यमीलाई एकै स्थानमा ल्याएर व्यावसायिक प्रवर्द्धनका साथै उद्योगमा भएका नवीनतम उपलब्धिबारे सूचना आदानप्रदान गर्ने तथा उपभोक्तामा ऊर्जाको व्यवस्थित खपत महत्त्वबारे जानकारी दिनु प्रदर्शनीको उद्देश्य रहेको छ।
