उखु किसानद्वारा अनिश्चितकालीन राष्ट्रिय राजमार्ग ठप्प पार्ने घोषणा

कृषि

गृहपृष्ठ
कृषि

उखु किसानद्वारा अनिश्चितकालीन राष्ट्रिय राजमार्ग ठप्प पार्ने घोषणा

क्यापिटल नेपालशनिबार, भदौ १४, २०८२

काठमाडौं। उखु बेचेको बक्यौता रकम र चालू आर्थिक वर्षको बजेटमा काटिएको ७० रुपैयाँ अनुदान यथावत् राख्नुपर्ने मागसहित आन्दोलनमा उत्रिएका उखु किसानले राजमार्ग केन्द्रित आन्दोलन गर्ने भएका छन्।

काठमाडौंमा आन्दोलनरत किसानले आज माइतीघरमा पत्रकार सम्मेलन गर्दै सबै जिल्लाका उखु किसानको सहभागितामा सर्लाहीको हरिवनमा भदौ २५ देखि अनिश्चितकालीन राष्ट्रिय राजमार्ग अवरुद्ध गर्ने घोषणा गरेका छन्।

शुक्रबार सरकारसँग वार्तामा बसे पनि परिणाम नआएपछि किसानले काठमाडौं छाडेर दबाबस्वरुप राष्ट्रिय राजमार्ग ठप्प पार्ने घोषणा गरेका हुन्। शुक्रबार सिंहदरबारमा भएको छलफलमा उखु किसान संघर्ष समिति र सरकारबीच कुनै सहमति हुन नसकेको समितिका प्रवक्ता उमेशचन्द्र यादवले बताएका थिए।

वार्तामा कृषि मन्त्री रामनाथ अधिकारीले किसानहरूलाई केही दिनका लागि आन्दोलन स्थगित गर्न आग्रह गरे पनि संघर्ष समितिले आन्दोलन नरोकिने बरु त्यसको स्वरुप परिवर्तन गर्न सकिने जवाफ दिएको थियो।

सोहीअनुसार आज पत्रकार सम्मेलन गरेर उखु किसानले राजमार्ग केन्द्रित आन्दोलन घोषणा गरेका हुन्। कृषि मन्त्रालयको वार्षिक बजेटमा उखु किसानका लागि २ अर्ब अनुदान छुट्याइए अर्थ मन्त्रालयले उक्त बजेट रोकेको आरोप किसानको छ।

‘काठमाडौंमा एक सातासम्म आन्दोलन गर्दासमेत सरकारले सुनेन। अब राजमार्ग केन्द्रित आन्दोलनमा जाने निर्णय भयो। हामीले अनुदान चन्दा माग्न आएका होइनौं। किसान पूरा गर्न सरकारलाई दबाब नपुगेको महसुस भएपछि र वार्तामा कुरा नमिले राजमार्ग अवरुद्ध घोषणा गरेका हौं,’ आन्दोलनका संयोजक श्यामबाबु रायले भने।

प्रकाशित मिति: शनिबार, भदौ १४, २०८२ १३:४५

प्रतिक्रिया दिनुहोस्