चाडपर्वलाई लक्षित गरी मुग्लिन-मलेखु सडक मर्मत गरिँदै

पूर्वाधार

गृहपृष्ठ
पूर्वाधार

चाडपर्वलाई लक्षित गरी मुग्लिन-मलेखु सडक मर्मत गरिँदै

क्यापिटल नेपाल बिहीबार, भदौ १९, २०८२

चितवन। नागढु‌गा-मुग्लिन सडक आयोजनाअन्तर्गत पश्चिम खण्डको मुग्लिन-मलेखु सडक स्तरोन्नतिसँगै चार्डपर्वलाई लक्षित गरी मर्मत गर्न थालिएको छ। दसैँमा यो सडक हुँदै आवतजावत गर्नेको संख्या बढी हुने भएकाले कालोपत्रबाहेक खाल्डाखुल्डी पुर्ने र सम्याउने काम थालिएको हो।

पश्चिम खण्डका प्रमुख केदारप्रसाद नेपालका अनुसार दसैँअघि कालोपत्रबाहेक सडकका सानाठूला खाल्डा पुर्ने गरी काम थालिएको हो। उनले भने, ‘दसैँ, तिहारमा आवतजावत गर्ने यात्रीको संख्या बढी हुने भएकाले उहाँहरूको सहजताका साथै दुर्घटना न्यूनीकरण गर्ने उद्देश्यले मर्मतमा केन्द्रित भएका छौँ।’

ठूला खाल्डा भएका ठाउँमा बाहिरबाट गिट्टी लगेर भर्न थालिएको छ। सडक सम्याउने काम पनि भइरहेको प्रमुख नेपालले जानकारी दिए। उनका अनुसार सो खण्डको ३८ किलोमिटरमध्ये आठ किमी कालोपत्र गरिसकिएको छ। ‘अरु केही भागमा कालोपत्र गर्ने तयारी गरिएको छ। त्यसबाहेकका खाल्डो परेका ठाउँहरूमा मर्मतसम्भारको काम थालिएको हो,’ उनले भने।

वर्षातको समयमा कालोपत्र गर्न नमिल्ने भएकाले सडकको छेउमा ‘स्टिल’ राख्ने तथा ‘आरसिसि सेफ्टीवेरियर’को काम भइरहेको जनाउँदै उनले योसँगै नाली निर्माण गरिएको बताए। सो खण्डमा पर्ने छ मध्ये चार वटा पुलको काम अन्तिम चरणमा पुर्‍याइएको नेपालले जानकारी दिए।

प्रकाशित मिति: बिहीबार, भदौ १९, २०८२ १३:०९

प्रतिक्रिया दिनुहोस्