जेनजी आन्दोलनमा दमनपछि राष्ट्रसंघले भन्यो– हत्याले स्तब्ध भयौं, छानबिन गरिनुपर्छ

राजनीति

गृहपृष्ठ
राजनीति

जेनजी आन्दोलनमा दमनपछि राष्ट्रसंघले भन्यो– हत्याले स्तब्ध भयौं, छानबिन गरिनुपर्छ

क्यापिटल नेपाल मंगलबार, भदौ २४, २०८२

काठमाडौं। भ्रष्टाचारविरुद्ध आन्दोलनमा उत्रिएको युवा पुस्ताको समूह जेनजीमाथि सोमबार भएको सरकारी नरसंहारपछि संयुक्त राष्ट्रसंघीय मानव अधिकार कार्यालयले घटनाको निष्पक्ष छानबिन माग गरेको छ।

संयुक्त राष्ट्रसंघीय मानव अधिकार कार्यालयका प्रवक्ता रविना शामदासानीका तर्फबाट जारी नोटमा भनिएको छ, ‘नेपालमा प्रदर्शनकारीको हत्या एवं घाइते भएकोमा हामी स्तब्ध बनेका छौं। यसको शीघ्र र पारदर्शी अनुसन्धानका लागि आग्रह गर्दछौं।’

सामाजिक सन्जाल प्लेटफर्ममा नेपाल सरकारले लगाएको प्रतिबन्धविरुद्ध भएको प्रदर्शनमा सुरक्षाकर्मीले अनावश्यक बल प्रयोग गरेको रिपोर्ट आफूहरूलाई प्राप्त भएको वक्तव्यमा उल्लेख छ।

संयुक्त राष्ट्रसंघीय मानव अधिकार कार्यालय प्रवक्ताले भनेकी छन्, ‘सुरक्षा बल र बन्दुकको प्रयोगसम्बन्धी आधारभूत सिद्धान्तको पालना गरिनुपर्दछ। हामी सरकारी अधिकारीलाई शान्तिपूर्ण भेला एवं अभिव्यक्ति स्वतन्त्रताको अधिकारको सम्मान र सुनिश्चित गर्न आह्वान गर्दछौं।’

सोमबारको प्रदर्शनमा प्रहरीले गोली चलाउँदा अनाहकमा १७ जना अवोध युवा पुस्ताले ज्यान गुमाएपछि प्रधानमन्त्री केपी शर्मा ओलीको सरकारमाथि घरेलु तथा बाह्य दबाब बढ्दै गएको छ।