प्राधिकरणद्वारा क्षतिग्रस्त प्रसारण लाइन मर्मतमा सहयोग माग

पूर्वाधार

गृहपृष्ठ
पूर्वाधार

प्राधिकरणद्वारा क्षतिग्रस्त प्रसारण लाइन मर्मतमा सहयोग माग

क्यापिटल नेपाल शुक्रबार, भदौ २७, २०८२

काठमाडौं। नेपाल विद्युत् प्राधिकरणले सुरक्षा संवेदनशीलताका कारण प्रसारण तथा वितरण लाइन मर्मतमा अप्ठेरो परेपछि सबै पक्षसँग आवश्यक सहजीकरणको आग्रह गरेको छ।

प्राधिकरणले सूचना जारी गरी वर्तमान कठिन परिस्थितिका कारण क्षतिग्रस्त संरचनाको मर्मत गरी विद्युत् सेवा सुचारु गर्न कठिनाइ भइरहेको बताएर सबै पक्षसँग सहयोग मागेको हो।

विद्युत् प्राधिकरणको विद्युत् प्रणाली व्यवस्थापन विभाग प्रमुख चन्दनकुमार घोषका अनुसार तीन प्रसारण लाइनमा आएको प्राविधिक समस्या समाधान हुन सकेको छैन।

उनका अनुसार ढल्केबर–चन्द्रनिगाहपुर–पथलैया प्रसारणलाइन, रुपनी–कुसाह र भरतपुर–कावासोती प्रसारण लाइनमा फल्ट आए पनि त्यसको पहिचान तथा मर्मतका लागि प्राधिकरणका प्राविधिक फिल्डमा जान सकेका छैनन्।

केही जिल्लाका वितरण लाइनमा पनि समस्या रहेको सूचना आए पनि वितरण केन्द्रले मर्मतमा कर्मचारी खटाउन नसकिएको उनले बताए।

खासगरी संरचनाको मर्मत कार्यमा खटिने अत्यावश्यक सेवाका सवारीसाधनको आवागमन तथा कार्यालय सञ्चालनमा सहजीकरण गर्न प्राधिकरणले आग्रह गरेको छ।

प्रकाशित मिति: शुक्रबार, भदौ २७, २०८२ ०८:२१

प्रतिक्रिया दिनुहोस्