पर्सा। दुई महिनाअघि मात्रै वीरगञ्ज महानगर–१२ का असहाव आलम ठकुराई वैवाहिक बन्धनमा बाँधिएका थिए। आफ्नो वैवाहिक जीवन राम्रोसँग अघि बढाउन नपाउँदै असहावले गत मंगलबार काठमाडौंमा भएको जेनजी समूहको प्रदर्शनीमा प्रहरीको गोली लागेर ज्यान गुमाए।
२२ वर्षीय असहाव भारतको विहार राज्यको पूर्वी चम्पारणको आदारपुर नजिकै बेल्दर्वाका रोक्सिता खातुनसँग दुई महिनाअघि मात्रै प्रणयसूत्रमा गाँसिएका थिए।
तर, कलिलो उमेरमै आन्दोलनमा परेर ज्यान गुमाएपछि अहिले वीरगञ्ज महानगर मुर्लीका बासिन्दा शोकमा डुबेका छन्। विगत तीन वर्षदेखि अध्ययन तथा रोजगारीका सिलसिलामा असहाव काठमाडौंमा रहँदै आएका थिए।
तर, मंगलबार पठाओमा यात्रुलाई गोंगबु लैजाने क्रममा प्रहरीको गोली लागेर जेनजी आन्दोलनमा सहादत प्राप्त गरेको उनको परिवारले जनाएको छ।
उनको मृत्युसँगै अहिले आमा नजला खातुन र श्रीमती रोक्सिता खातुन बेलाबखतमा मुर्छित हुँदै अचेत अवस्थामा रहेका छन्। आफ्नो छोराको मृत्युले विछिप्त आमा नजलाले छोरा श्रवणकुमारजस्तै आमाबुबालाई असाध्यै माया गर्ने सन्तान रहेको बताइन्।
‘मेरो छोरा श्रवणकुमारजस्तै थियो। भर्खरै बिहे गरेर बुहारी भित्र्याएको थियो। अब मेरी बुहारी कसको मुख हेरेर बाँच्ली?’ आमा नजलाले रुँदै भनिन्, ‘दुई महिनाअघि मात्रै विवाह गरेर ल्याएकी बुहारीको सिउँदो उजाडिएको छ।’
आमा नजमाले आफ्नो छोरालाई प्रहरीले किन मारेको भनेर बारम्बार प्रश्न सोध्दै आइरहेकी छन्। ‘अहिले बुहारी छोराको यादमा बिलौना गरेर बसिरहेकी छन्। मेरी बुहारीले के अपराध गरेकी थिइन् र उनलाई विछोड गराइयो?’ उनले स्तब्ध हुँदै भनिन्।
मृतक ठकुराई पाँच सन्तानमध्येका तेस्रो छोरा हुन्। असहाव वीरगञ्जको ग्लोबल बिजनेस कलेजबाट कक्षा १२ व्यवस्थापन संकाय पास गरेर थप अध्ययन र रोजगारीका लागि काठमाडौं गएका थिए।
असहावका छिमेकी मनोज गुप्ताले गत मंगलबार बिहान १०ः०० बजेपछि सम्पर्कविहीन भएपछि खोजी गर्दा उनको शव काठमाडौंको महाराजगञ्जस्थित शिक्षण अस्पतालमा भेट्टिएको जानकारी दिए।
‘असहावको छाती र पेटमा गरेर दुई वटा गोली लागेको देखिन्छ’, उनले भने, ‘शुक्रबार परीक्षणलगायतका प्रक्रिया पूरा गरेर असहावका काकाले उनको शव ल्याउँदै हुनुहुन्छ।’ छिमेकी गुप्ताले असहाव निकै मिजासिलो र आँखामा राख्दा पनि नबिजाउने प्रकृतिको व्यक्तित्व रहेको बताए।
असहावका काका असराल आलम ठकुराईले असहावको मृत्युले निकै मर्माहत भएको सुनाए। ‘उनको मृत्युले हामी निकै मर्माहत भएका छौं’, उनले भने, ‘जेनजी आन्दालेनमा असहावजस्तै ज्यानको आहुति दिने योद्धाको बलिदानले मुलुकमा नयाँ क्रान्तिको सुरुआत होस्।’
वीरगञ्ज महानगर–१३ का पूर्ववडाध्यक्ष तुफान अन्सारीले आफूले एक असल छिमेकी भाइ गुमाउनुपर्दा निकै मर्माहत भएको बताए।
‘असहाव भाइ निकै असल व्यक्ति थिए। उनको निधनले अपुरणीय क्षति भएको छ’, उनले भने, ‘अहिले उनको परिवार मात्रै नभएर सिङ्गो मुर्लीवासी स्तब्ध र शोकमा डुबेका छौं।’ शुक्रबार साँझ जेनजी आन्दोलनमा ज्यान गुमाएका असहावको सम्झना गर्दै वीरगञ्जका मुर्लीबासीले प्रतिमाचोकमा मैनबत्ती बालेर स्मरण गरेका छन्।–रासस
-1757740509.jpeg)
-1720689235.jpg)
